Festival Kreol |27 October 2023

Zanfan La Digue i reviv laserenad

Sete en lanbyans antyerman kreol kot lekol La Digue yer apremidi apre ki zelev ek zot ansennyan ti’n vin ansanm pour partisip dan en gran laserenad alokazyon Festival Kreol.

Sa aktivite tre koloran, organize par Konsey Nasyonal pour Zanfan (NCC) ek lekol La Digue avek sipor plizyer biznes ek endividi lo sa zil i premye laserenad zanfan.

En delegasyon NCC anba gidans son sef egzekitiv, Yasmin Umarji, ti zisteman La Digue pour sa levennman spesyal.

Laserenad ti ordinerman deroul kot en maryaz tradisyonnel.

E yer bann etidyan lakres ziska segonder ti’n vin ansanm pour reviv sa moman.

Kiltir ek tradisyon kreol ti vin vivan atraver maryaz tradisyonnel, zwe tel ki mardilo, ladans, peser ek pirat, e i annan ki ti’n menm pran letan pour dekor mwayen transpor prensipal lo sa zil ki bisiklet.

Tou sa la ti pe deroul lo ler sanson tradisyonnel.

Laserenad ti konmans dan lakour lekol ziska kot lasose, e retourn lo menm pa, anba laklamasyon Digwa ek viziter ki ti’n aliny semen pour siport sa bann zenn pandan ki zot ti pe viv zot tradisyon.

NCC in dekrir sa premye aktivite konman en reisit, e enn ki pou definitivman lo son kalandriye anyel.

Nou seleksyon portre i montre enn de moman for sa laserenad.

Patsy Canaya