US i deplor dekouvert de bwat vote Beau Vallon |29 October 2020

United Seychelles in dir i aksepte rezilta eleksyon ki’n fek fer dan lentere nasyonal e lavenir pei.

Sepandan, dan en kominike pibliye yer, United Seychelles i dir ki dekouvert sa 2 bwat vote dan lekol Beau Vallon 2 zour apre ki rezilta ti’n swadizan fini ganny rekonsilye, ‘tally’ e konte “in konfirm konklizyon lamazorite Seselwa ki sa eleksyon in ganny marke par tro bokou iregilarite, konfizyon e mister ki met kredibilite rezilta sa eleksyon an dout”.

“I tre kler ki sa Komisyon Eleksyon napa kapasite ek konpetans pour organiz en eleksyon ki donn lepep Seselwa konfyans dan rezilta enn bann prosesis demokratik pli enportan dan pei,” sa kominike United Seychelles i azoute.

Sa kominike i kontinyen an dizan:

“Sak vot i konte e lepep Seselwa i devret annan konfyans ki son vot i touzour sekre e ganny konte.

“Desizyon pour met lorganizasyon en eleksyon sitan enportan dan lanmen en komisyon sitan ineksperyanse ki’n ganny enfliyanse par serten parti politik, ti en gran lerer par sizyenm Lasanble akoz sa bann konfizyon e problenm zanmen in egziste dan eleksyon lepase.

“United Seychelles i alors demande ki sa Komisyon Eleksyon ek son chairperson i fer sa ki onorab e sa ki lepep pe demande e resign akoz lorganizasyon en eleksyon i devret reasir TOU Seselwa ki rezilta final i enn ki kredib.

“United Seychelles i demande ki plas i ganny fer pour en nouvo komisyon e chairperson ki a tir leson lo sa ki’n arive e konmans prepar zot byen boner pour eleksyon konsey distrik ki pe vini.”

Kominike sorti kot United Seychelles

Not Redakter:

Bann deklarasyon ek pwennvi dan sa kominike i pour United Seychelles e pa neseserman reflekte pwennvi zournal Seychelles NATION.