US i demann son siporter pour reste kalm e respekte lopinyon tou dimoun |08 September 2020
Parti United Seychelles in demann tou son siporter fidel pour reste kalm e respekte lopinyon dimoun, me pour anmenmtan reste ferm lo zot prop konviksyon.
United Seychelles in dir sa apre ki in ganny demande pour enform piblik lo son pozisyon konsernan deklarasyon ki Msye Despilly William ti fer dan Konvansyon Parti LDS Sanmdi pase.
Msye William ti piblikman anonse ki ansyen Prezidan James Michel in telefonn li pour dir li dir avek Msye Wavel Ramkalawan (kandida prezidansyel LDS pour prosen eleksyon) ki i (Msye Michel) deryer li (Msye Ramkalawan) e i pou donn li tou son sipor pour sa eleksyon ki pe vini.
Dan en kominike lapres, United Seychelles i dir ki sa eleksyon prezidansyel ek Lasanble Nasyonal an Oktob i tre enportan, sirtou avek sa difikilte ekonomik ki Sesel ek lemonn pe fer fas avek.
«I enportan ki nou pa les nou ganny distrer, me ki nou konsantre lo sa ki vreman enportan. Nou devret konsantre lo fer nou desizyon lo lekel kandida nou konvenki i meyer pour diriz pei e lo son plan pour nou lavenir. United Seychelles i demann tou nou siporter fidel pour reste kalm e respekte lopinyon dimoun, me pour reste ferm lo nou prop konviksyon,» sa kominike i dir.
United Seychelles i fer lapel avek tou dimoun pour kontribye pour ranforsi linite, larmoni ek respe dan nou sosyete.
Kominike United Seychelles