34enm Festival Kreol Mont Fleuri i venker konpetisyon kanmtole enterdistrik |02 November 2019
Le de lekip Mont Fleur ki’n sorti venker dan konpetisyon kanmtole enterdistrik
Lekip danser ek dansez sorti dan distrik Mont Fleuri ti rakle premye pri dan tou le de kategori – 17 a 35-an ek 36-an e plis – pandan final konpetisyon kanmtole enterdistrik.
Sa konpetisyon ti fer Merkredi swar dan en Sant Konferans Enternasyonal (ICCS) ranpli avek bann fanatik ladans tradisyonnel osi byen ki avek bann siporter.
Levennman ti’n ganny organize par departman gouvernman lokal an kolaborasyon avek Lazans pour Lendistri Kreativ ek Levennman Nasyonal (CINEA).
Pour premye kategori 17 a 35-an, bann lekip kanmtole sorti dan diferan distrik ti montre zot talan dan ladans kotis doub, vals ek avan trwa tandis ki kategori 36-an e plis ti pe dans vals, polka ek galo.
Zot ti pe swiv direksyon konmander dan benn ‘Leve Tradisyon’.
Tou le de lekip Mont Fleuri dan le de kategori ti’n byen abiye dan zot resanz an ver pour demontre ki zot annan lakadans e sirtou teknik, e pour zot sorti konman gran venker.
Dan kategori 17 a 35-an, dezyenm pri ti al pour distrik Takamaka e trwazyenm plas ti al pour lekip Anse Etoile.
Cascade ti pran dezyenm pri dan kategori 36-an e plis, swivi par Bel Air dan trwazyenm pozisyon.
Pour sa lannen, premye pri ti 10,000 roupi, dezyenm 8000 roupi e trwazyenm 6000 roupi.
Panel ziri ti konpri Chantale Ellen konman sef ziri, Alain Jules ek Tessie Accouche.
Zot desizyon ti baze lo kriter tel ki kostim, postir, konnesans, lepa ek lakadans.
Elsie Pointe
