Mesaz lider United Seychelles, Dr Patrick Herminie, pour Lazournen Laliberte Lekspresyon, le 3 Me |04 May 2023
Dr Patrick Herminie
«Laliberte lapres pe regrese dan nou pei ozordi»
«A lokazyon Lazournen Laliberte Lekspresyon ki ti yer le 3 Me, United Seychelles i oule ankor enn fwa fer rapel ki laliberte lapres i fondasyon lademokrasi ek lazistis.
«Lapres i 4enm pilye nou demokrasi alors i bezwen ganny zere avek bokou responsabilite. I malere, sepandan, ki lapres sirtou medya sosyal ki ti’n kapab anmenn bokou plis larmoni ek konnesans dan nou kominote e dan nou pei, i ozordi pe ganny servi pour dezenformasyon avek bi pour fer kalonmni lo sitwayen.
«United Seychelles i osi note ki i malere ki medya ofisyel, sirtou bann ki ganny finanse par leta, i ankor pri dan en mantalite ki zot vwar zot rol konman portparol gouvernman. Nou Konstitisyon i met en lobligasyon lo medya finanse par gouvernman pour rod bann pwennvi diverzan lo bann size ki afekte popilasyon.
«I tre malere, sepandan, ki sa ozordi pa pe ganny fer.
«Gouvernman ti devret devan pour protez laliberte lapres me ozordi nou vwar en gouvernman ki pe siprim laliberte lapres, legzanp zournalis ki’n ganny enterdi pour vin konferans lapres State House e parti politik ki ganny arase zot drwa pour fer konferans lapres.
«Laliberte lapres pe regrese dan nou pei ozordi.
«Nou tre atriste alors, ki lo lendeks enternasyonal pour laliberte lapres, Sesel in desann sorti 13enm pour vin 34enm. Nou swete ki gouvernman i a pran sa devlopman seryezman avek bi pour fer Sesel reganny respe ki ti annan an sa ki konsern laliberte lapres.»