Follow us on:

Facebook Twitter LinkedIn YouTube

National Assembly

Lasanble i aprouv en seri propozisyon pour amelyor kondisyon travay bann stevedores |04 November 2022

Bann manm Lasanble in diskit e donn zot sipor plizyer propozisyon pour amelyor kondisyon travay bann stevedores e osi siport bann lakonpannyen ki anploy zot pour asire ki zot ede fer sa bann dimoun ganny en lot travay letan ki napa bato.

Sa ti atraver en mosyon table par MNA pour Plaisance, Richard Labrosse.

Sa mosyon ti lir koumsa: “Lasanble i demann gouvernman pour met anplas, ansanm avek sekter prive, bann mezir apropriye pour soutenir stevedores ler zot napa louvraz dan zot sekter loperasyon.”

Ler i ti prezant son mosyon, Onorab Labrosse ti eksplike ki detrwa lannen pase ti annan bokou diskisyon otour kondisyon travay bann stevedores e an 2018 SI 36 ti sorti avek tit ‘Stevedores’ condition of employment’ e sa ti anba regilasyon lanplwa 2018 .

Sa SI ti sit en seri mezir ki ti pour siport e kouver bann stevedores konman bann travayer Seselwa. Parmi sa bann mezir ti annan provizyon pour saler minimonm ki ti dapre tonnaz ek lezot provizyon parey lezot travayer Seselwa i zouir tel konman konpansasyon.

En lot keksoz ki sa SI ti adrese ti en retainer allowance pour ki en stevedore i atase avek en sel anplwayer me dapre konpran ziska prezan sa pa’n materyalize e dapre konpran serten anplwayer i dir ki sa bout dan sa SI pa’n vin anmars akoz bann stevedores i kapab travay dan en lakonpannyen bomaten e al kot en lot apremidi alor zot krwar ki si sa lalwa ti ganny aplike i ti pour anmar lanmen bann stevedores. Me vre rezon akoz sa konponan dan sa SI pa’n vin anfors i pa vreman kler.

Le 23 Septanm 2019 en lot SI ti sorti pour ranplas sa enn sorti an 2018 touzour anba regilasyon lanplwa e touzour pe adres kondisyon travay bann stevedores e i ti sipoze antre an viger le 1er Oktob 2019.

Onorab Labrosse in fer resorti ki tou sa bann SI i laprev ki i annan travay ki’n ganny fer pour protez lentere bann stevedores e osi laprev ki zot travay i ganny rekonnet.

Me i dir napa okenn provizyon ki’n fer pour siport bann lakonpannyen ki anploy sa bann stevedores e serten lakonpannyen in dir ki parfwa zot ganny difikilte pour ganny travayer de kalite ler i annan travay e sa in fer ki de parmi sa trwa lakonpannyen ki anploy stevedores i kapab aprezan annan drwa fer vini travayer etranze e sa i akoz zot rankontre tro bokou defi avek serten travayer Seselwa. Serten sa bann defi i disiplin, travayer ki vyolan, ki vole e pa respekte kanmarad e i annan ki servi drog ler zot pe travay.

“I kler alor ki menm si i annan sa SI ki’n etabli kondisyon travay pour bann stevedores, aprezan kek lankadreman i neseser pour ede lo kote sekirite an zeneral e ede pour fer zot pran zot responsabilite konman en travayer dan zot pei. Menm parey sekter prive in travay ansanm avek gouvernman pour kapab devlop sa SI, i neseser ki zot osi pare pour zwenn ankor avek gouvernman pour etabli bann mekanizm ki ava ed zot menm dan zot bann lobzektif konman anplwayer bann stevedores,” Onorab Labrosse in fer resorti.

I’n osi fer remarke ki bann tel lankadreman ki i pe koz lola pa nouvo e i deza annan  bokou pei kot i egziste en lankadreman formel otour travay bann stevedores parey Lostrali kot i dir i annan kat kategori stevedores.

A sa pwen Onorab Labrosse ti donn detay lo sa bann diferan kategori stevedores e i ti osi fer resorti ki ler i annan en lankadreman formel sa i ava fer provizyon pour regilasyon neseser vi ki sa laspe sekirite travayer i enn ki preokip bann lakonpannyen bokou me i malere ki serten sa bann problenm i koze par move konportman bann stevedores zot menm.

“Alors en lankadreman nasyonal formel i ava osi annan bann regilasyon ki bann stevedores ava oblize swiv par egzanp lo kote lizyenn, vi ki zot pe travay avek matyer premyer manze pour imen, sa i kapab ganny regilarize anba bann regilasyon food handling kot dapre lalwa Sesel kot manze i ganny manipile, i annan serten tes medikal ki travayer i bezwen fer e osi i annan serten maladi ki dimoun i gannyen ki pa permet zot manipil prodwi manze. Me ansemoman bann stevedores pa pe fer sa bann tes. Osi lo  kote lasante en dimoun i bezwen annan en bon kondisyon lasante avan i kapab antre lo por pour fer louvraz stevedoring. Par egzanp si en dimoun i ganny bebelouka (epilepsy) i kapab en danze pour son prop lekor oubyen pour en lot stevedore. Sa trwa lakonpannyen i kapab travay ansanm avek sipor bann minister ek lezot departman konsernen pour drafte en dokiman ki adres bann kondisyon lo kote lizyenn ek medikal. Lo kote litilizasyon sibstans, en dimoun ki anba lenflians lalkol oubyen drog i kapab en gro danze pour lezot e i devret annan regilasyon ki depi kot larantre en dimoun ki ganny detekte anba lenflians pa kapab ganny akse avek en landrwa telman okipe e danzere parey lo por. Lo kote sekirite vi ki por i en landrwa avek bokou mouvman i enportan ki bann stevedores i servi bann lekipman apropriye ki bokou pa oule mete. Me en lankadreman formel i ava fer sa obligatwar e osi en proteksyon pour zot menm,” Onorab Labrosse in fer resorti.

Onorab Labrosse ti detay plizyer lezot fason ankor ki sa bann lakonpannyen i kapab siport e pli byen akonpanny sa bann stevedores dan bann letan ki napa bato parey ed zot ganny en lot travay avek bi ki zot kontinyen travay.

Onorab Labrosse i dir son bann propozisyon i pa pour pini bann stevedores oubyen abes zot me plito pour donn sipor bann lakonpannyen ki anploy zot pour fer sir zot kapab kontinyen travay akoz zot osi bann gran kontribiter dan lekonomi nou pei e i pour sa rezon ki nou bezwen byen regilariz zot travay pour ki zot trouv byen zot plas dan sa sekter primordyal Sesel.  

Lasanble in osi aprouv en lot mosyon table par MNA pour Grand Anse Mahé, Waven William, ki pe demann gouvernman pour revwar fason ki bann aktivite komersyal i ganny fer dan lavil Victoria. Sa mosyon ti lir koumsa: “Swivan lelan devlopman e lenkonvenyans tel parey gaspiyaz resours dan rezyon lavil Victoria, Lasanble i demann gouvernman pour revwar lafason ki aktivite i ganny fer dan lavil.”

 

 Marie-Anne Lepathy

More news