Dan Lasanble Nasyonal - Lobligasyon, disolisyon maryaz i domin diskisyon lo lamannman Kod Sivil |13 September 2019

Bann diferan lobligasyon ki de dimoun i annan apre ki zot in marye, lobligasyon ki zanfan i annan anver zot paran e visversa osi byen ki tou bann laspe ki annan pour fer avek disolisyon en maryaz, rezon ki sa i arive ti parmi bann pwen ki ti domin deba yer pour amann diferan parti Kod Sivil Sesel ki pe deroule depi Merkredi dan Lasanble Nasyonal.

Pandan en lazournen antye bann manm in konsantre lo tou bann diferan laspe ki annan pour fer avek rezon ki en maryaz i terminen, kwa ki lalwa i dir, ki dimoun i bezwen fer pour ganny divors, separasyon, disolisyon zot maryaz, byennet zanfan, zot mentenans, parmi en kantite lezot laspe ankor ki relye avek sa size disolisyon en maryaz.

Deba lo bann lamannman ki’n propoze ek lezot ki pe ganny anmennen ofir e anmezir pour sanz Kod Sivil i kontinyen dan Lasanble Nasyonal ankor ozordi.