Lasanble Naysonal: Konmansman 3enm trimes |11 September 2019

Bann dirizan i eksprim zot swe pour sa ki zot anvi vwar akonplir

Spiker Lasanble Nasyonal, Msye Nicholas Prea in yer bomaten akey bann manm pour trwazyenm e dernyen trimes pour sa lannen.

Dan sa premye sesyon Msye Prea ti enform bann manm ki i annan bokou travay devan zot e ki alor i pou en trimes tre sarze kot bann sesyon pou ogmante pour Lasanble kapab konplet tou sa bann travay ki in deza konmanse avan prezantasyon bidze pour lannen prosenn, le 31 Oktob. Sa pou swiv par reaksyon bann manm e apre Lasanble pou zwenn toulezour pour depouy tou bann alokasyon ki bann diferan antite e departman gouvernman in gannyen.

Msye Prea in swet tou manm sekretaryat Lasanble kouraz dan zot travay e demann zot pour kontinyen gard sa o nivo standar e in remersi tou bann medya sirtou televizyon pour anmenn travay Lasanble pli pros avek pep Seselwa.

Lo son kote, dirizan zafer gouvernman Msye Charles de Commarmond li in dir sa dernyen trimes pou enn tre enportan pour Lasanble vi bann travay tre enportan ki in konmanse e i bezwen konplete.

«Pli enportan i sa travay enorm lo Kod Sivil ki nou pe konmans avek ki sa bann lamannman pou osi annan en lenpakt lo lavi Seselwa si zot ganny aprouve e tousala i fer ki nou konman bann manm Parlman nou bezwen fer sir ki nou travay i reste alaoter e a lekspektasyon pep Seselwa,» Msye de Commarmond in dir.

Msye de Commarmond in fer resorti ki bidze osi pou en lot size enportan ki Lasanble pou bezwen depouye e aprouve pandan sa trimes e in demand tou bann manm pour fer bann deba pli profon ankor pour asire ki tou nou dimoun i ganny enkli dan sa bidze e vwar zot pe benefisye.

Dirizan lopozisyon Msye Wavel Ramkalawan li in dir i ekspekte ki sa enn trimes i enn kot bann manm i rod rezilta e kot bann langazman ki pou ganny donnen ava ganny garde e delivre, ki aksyon lo demann ki bann reprezantan lepep Seselwa i fer ava ganny swiv apre deba dan Lasanble.

Msye Ramkalawan in fer resorti ki en trwazyenm trimes dan lavi nenport ki lenstitisyon ki swa Lasanble Nasyonal, lekol, landrwa travay i tre enportan e in eksprim swe ki parmi bann rezilta pour pep Seselwa ki Linyon Demokratik Seselwa (LDS) i swete vwar i enkli ki STC i pran bann mezir konkret pour elimin bann middlemen pour fer ki pri bann komodite ava pli afordab pour pep Seselwa, ki bann kontrakter i ganny peye aler apre ki zot in konplet en travay, ki demann bann fermye i ava ganny ekoute e akonplir letan zot pe koz lo sa size taks, ki bann landrwa travay swa dan gouvernman swa dan prastatal i pey zot travayer zot long term employment benefits, ki zafer grid saler pour travayer piblik i ganny retire ankour pour ki tou travayer ava benefisye avek en logmantasyon 500 roupi pour fer ki tou dimoun ava ganny menm logmantasyon, ki bann minis letan zot vin dan Lasanble ava reponn kestyon avek laverite e donn bann detay ki Lasanble i demande, ki legzekitif pa ava zwe avek bann sitwayen e ki tou bann lototorite ava pran zot travay serye pour delivre pour pep Seselwa e pour ki larises nou pei atraver travay ki nou fer ava vreman ganny partaze e sa vorasite ki egziste parmi serten ava ganny koupe e pour ki par egzanp sa bann later kot zis serten non ki kontinyen benefisye ava retourn pour Leta pour benefis tou Seselwa.