Minis Hoareau i reponn kestyon lo son minister |09 September 2022

Minis pour Gouvernman Lokal ek Zafer Kominoter, Rose Marie Hoareau, ti dan Lasanble Nasyonal Mardi bomaten pour reponn serten kestyon konsernan son minister.

Premye kestyon ti sorti kot manm elekte United Seychelles (US) pour La Digue ek bann Zil Pros, Onorab  Rocky Uranie ki ti le konnen si travay renovasyon pe ganny fer lo sant ‘day care’ lo sa zil pour anpese ki sitiasyon i agrave e osi konbyen i koute pour lwe sa lokasyon.

Dan son larepons, minis ti eksplike ki son minister i annan 15 sant ‘day care’ dan 15 lokasyon atraver pei ki i lwe.

I ti dir ki serten parmi sa bann sant zot date depi 1992 e kot i aparan ki zot lenfrastriktir in ganny neglize pandan plizyer lannen.

I ti azoute ki menm si i regretab pour zwenn zot dan en tel leta, son minister in fer son mye depi 2021 pour fer renovasyon lo otan ‘day care’ ki posib.

Minis Hoareau ti dir ki logmantasyon dan pri lokasyon ti ganny pran pandan en miting avek bann operater an Zanvye 2022 kot ti annan en konsansis lo lease ek nouvo tarif ki pou ganny peye.

I ti fer remarke ki sa nouvo tarif ti pran lefe an Mars 2022. I ti note ki serten travay renovasyon in deza ganny fer lo sant ‘day care’ La Digue e lezot travay ki reste pou kontinyen an 2023.

Trwa lezot ‘day care’ ki travay renovasyon pou ganny fer lola prosennman i Mont Fleuri, Baie Lazare ek Anse Royale e sa pou ganny swiv par travay renovasyon lo lezot ‘day care’ dan lezot distrik.

Lot kestyon Onorab Uranie ti lo travay renovasyon lo sant kominoter La Digue kot i ti demande ki anvi 2 milyon roupi in bidzete pour bann tel travay lo bann sant dan bann distrik, konbyen kontrakter ki ti ‘bid’ pour sa proze in demande, lekel ki ti gannyen, konbyen letan i pe pran pour fer travay e kan ki travay i ekspekte konplete.

Minis ti dir ki travay lo sant kominoter La Digue, ki sitiye lo premye letaz biro ladministrasyon distrik, ti konplete an Zen 2022 a en kou 2.2 milyon roupi.

I ti fer remarke ki batiman antye i demann fer renovasyon lo la an rezilta neglizans par lepase, me son minister ti bezwen prioritiz travay akoz kontrent bidzeter. Twra kontrakter ti ‘tender’ pour sa proze renovasyon lo sa sant kominoter.

Lo kote plan minister pour relans progranm animasyon dan bann distrik ek bann aktivite ki pou tonm anba sa progranm, demande par manm elekte LDS pour distrik Glacis, Onorab Regina Alcindor,  Minis Hoareau ti dir ki depi ki bann restriksyon lasante in ganny retire, plizyer progranm in deza konmanse anba skim animater dan bann distrik atraver pei.

I ti eksplike ki sa skim i pour dimoun tou laz ki ganny fer atraver bann aktivite byen ankadre par enn ou plizyer animater ki lo en baz volonter.

Minister pe kontinyen ankouraz planifikasyon ek enplimantasyon san bann progranm vize ver laspe kiltirel, sportif, lwazir, edikasyonnel, lar ek lartizana, parmi lezot, dan bann distrik, atraver en bidze 3 milyon roupi.

Minis Hoareau ti osi lans en lapel avek bann dimoun ki annan konnesans dan bann size ki’n ganny mansyonnen pour vin devan pour ede avek progranm animasyon.

Onorab Sylvanne Lemiel, manm elekte US pour distrik Anse Royale, ti demann minis pour konfirmen si i vre ki i annan en bidze 500,000 roupi pour koup pye dibwa dan distrik.

Minis ti eksplike ki an 2020 ler nouvo ladministrasyon ti antre, ti annan en bidze 9 milyon roupi pour proze dezas dan minister kot ladan 500,000 ti ganny dedye pour koup pye dibwa enkli bann lo later prive. 

I ti azoute ki an 2021 avek konstrent bidzeter, bidze dezas ti redwir pour vin 3 milyon roupi e pour byen zer sa larzan minister ti deside retir sa fon 500 mil ki ti’n dedye apar pour koup pye dibwa e les sa 3 milyon ouver pour deroulman dezas lo en kote irzans an mezir ki i arive.

I dir ki sa 3 milyon i kouver koup pye dibwa, retir ros ki’n deboule, linondasyon ek lateras grennen, parmi lezot. I note ki minister ti servi 30,096 roupi pour koup pye dibwa dan bann ka irzan an 2021.

Dernyen kestyon pour Minis Hoareau ti sorti kot manm elekte US pour distrik Port Glaud, Onorab Egbert Aglae, kot i ti demande si ti annan nouvo tarif pour lwe bann sant kominoter swivan elevman bann restriksyon lasante e osi si i annan nouvo tarif pour lwe serten servis tel ki sez ouswa latab.

Minis Hoareau ti dir ki napa ogmantasyon dan pri lwe lasal pour ban group ki fer miting e sa i ankor 250 roupi par erdtan ziska 3erdtan. Pour ban lezot fonksyon divertisman tel ki parti, bal, maryaz eksetera, pri i varye ant 3 mil roupi a 4500 roupi depandan lo kapasite ek leta sa sant.

Lo kote lwe sez ek latab, minis ti dir ki en desizyon in pran pour aret sa kalite servis akoz bokou fwa sa bann fasilite i ganny kase pandan sa bann aktivite e ler ou kakil ki en sez ti pe ganny lwe pour 5 roupi e en latab pour 10 roupi, i pa ti rantab.

I ti azoute ki minister pe les sa biznes lwe sez ek latab avek bann pti biznes dan kominote.

I ti fer remarke kanmenm ki dapre rezondet serten kalite fonksyon, minister i asiste avek lasal pour nanryen avek serten lorganizasyon ek group, tel ki group twrazyenm-az, group volonter ek group dezabilite parmi lezot.

Patrick Joubert