Departman lafanmir i konsernen par problenm sosyal e i lans lapel pour plis linisyativ pour ed bann fanmir |21 July 2022
Minis responsab pour lafanmir in dir ki son minister i vreman konsernen avek kantite problenm sosyal ki nou sosyete pe esey fer fas avek e in lans lapel pour ki lotorite distrik ansanm avek bann groupman sosyete sivil konsernen avek lafanmir ek lezot ki annan bann proze ek linisyativ pour vin devan e son minister i pare pour ekoute e ankouraz zot e ed zot realiz zot bann proze.
Minis Marie-Celine Zialor ti eksprim sa konsern e lans sa lapel sa semenn dan Lasanble Nasyonal letan i ti pe reponn en kestyon lo bann problenm sosyal par manm proporsyonnel Doyace Porice (Linyon Demokratik Seselwa).
Minis Zialor ti dir ki problenm dan bann fanmir i partou dan nou pei e pour lamazorite i enkli
labi drog ek lalkol, vyolans domestik, bann diferan labi kont zanfan, bann ka depresyon sever, parmi lezot ankor ki tou i dekoul dan problenm lakaz.
«Departman lafanmir i annan manda pour travay lo bann progranm prevansyon e pour ede devlop bann pratik ek bann fason viv dan fanmir pour transform nou sosyete dan en fason pli pozitiv kot i ava annan mwens sa bann problenm sosyal. Minister pe osi revwar bann polisi ansanm avek bann partener pour met zot azour avek realite bann fanmir ek sosyete kot nou pe viv ozordi,» Minis Zialor ti dir.
Me eski pou annan en groupman ki pou ganny formen dan distrik ouswa lo nivo nasyonal ki pou desarz sa bann progranm lafanmir?
Lo sa pwen Minis Zialor in dir ki departman lafanmir i swete ki zefor pour ed bann fanmir pa sorti zis kot gouvernman. «Pou annan bann progranm pour lafanmir ki pou desantralize swa o nivo distrik ou swa o nivo rezyonnal. Sa pou par egzanp letan departman lafanmir pou konmans son bann progranm pour bann koup e osi bann sesyon parenting ki NCC pe fer i ava ganny fer o nivo distrik. Si pou annan en groupman ki pou ganny formen dan distrik ouswa lo nivo nasyonal ki pou desarz progranm lafanmir dan sak distrik, sa i ava depan lo lotorite sak distrik e lo bann sosyete sivil konsernen avek lafanmir ek lezot ki deside pour fer li,» Minis Zialor ti eksplike.
Me Minis Zialor in fer resorti ki son minister napa okenn bidze spesifik akoz napa sa progranm ki kestyon pe demande.
Antretan, Minis Zialor in fer rapel bann manm Lasanble Nasyonal e piblik an zeneral ki lo nivo nasyonal i deza annan plizyer lazans ki donn sipor bann fanmir dan diferan fason e dimoun ki vwar zot dan difikilte zot kapab al rod led ek konsey a nenport moman.
Marie-Anne Lepathy