Dimoun avek dezabilite pe ganny ankouraze pour rod lasistans atraver en fon ki a zot dispozisyon |20 July 2022

Dimoun avek dezabilite pe ganny ankouraze pour rod lasistans atraver Disabled Trust Fund dan ki en sonm 400 mil roupi i ganny mete ladan toulezan pour asiste zot.

Minis responsab pour lafanmir Marie-Celine Zialor in dir ki bann nouvo kriter ki’n met anplas i fer provizyon pour ki sa fon i ganny servi pour aste bann lekipman enpe pli spesyalize ki bann dimoun avek dezabilite i bezwen, ki en dimoun i bezwen ganny sertifye par en dokter ki i annan en dezabilite, ki i pa pe ganny lasistans en lot landrwa pour menm bezwen e osi ki sa resipyan i en Seselwa.

Minis Zialor ti donn sa bann detay dan Lasanble yer bomaten letan i ti pe reponn en kestyon MNA Naddy Zialor lo sa size.

An sa ki konsern kantite aplikan ki’n annan depi ki sa nouvo prosedir in ganny etabli e konbyen dimoun ki’n ganny asiste Minis Zialor in dir ki in annan 46 laplikasyon ki’n ganny soumet depi ki sa nouvo prosedir in ganny etabli e ladan sis in fini ganny asiste, senk in ganny aprouve pour ganny asiste byento tandis ki lezot i bezwen met annord zot bann dokiman avan ki zot kapab ganny asiste.  

Me eski i annan okenn aplikasyon ki ti pending avan nouvo prosedir in vin anplas e ki pa ankor ganny asiste?

Minis in dir ki wi in annan bann laplikasyon e de ladan in fini ganny asiste e lezot pou bezwen met zot bann dokiman annord savedir annan bann kotasyon apropriye avan ganny asiste.

Antretan Minis Zialor in dir ki i osi annan bann endividi ek bann biznes ki pe ede pour aste bann lekipman pour bann dimoun avek dezabilite e in profite pour remersye zot e in lans en lapel pour lezot dimoun ki kapab ede pour vin devan pour ki nou pa depan zis lo sa fon.

Sak lannen 400 mil roupi i ganny mete dan sa fon e pour sa lannen ziska la en sonm 130 mil roupi in ganny depanse ladan, PS Roukou in dir.

I’n osi fer resorti ki i annan bann progranm ledikasyon pour edik bann aplikan potansyel lo legzistans sa fon, ki zot devret fer pour ganny akse avek sa fon.

PS Roucou i dir ki parmi bann keksoz ki sa fon i ed bann dimoun avek i sez roulan, modifye parti bann lakour pour fer zot pli disabled friendly e i dir pli gro sonm larzan ki sa fon i depanse lo en proze i ant 40 a 50 mil roupi.

Marie-Anne Lepathy