Dan Lasanble Nasyonal |07 July 2022

Minis i donn detay lo demars pour ogmant prodiksyon agrikol lo Praslin

Minis responsab pour lagrikiltir in donn bann manm Lasanble Nasyonal detay lo demars pour ankouraz plis devlopman ek prodiksyon agrikol lo Praslin.

Minis Flavien Joubert ti dan Lasanble Mardi pour reponn kestyon bann manm lo sa size.

I’n fer resorti ki dan sa 73.7 ektar later ki’n dezinyen pour lagrikiltir lo Praslin napa bokou ki lib e nouvo later ki pa ankor donnen ek fermye i zis 6.4 ektar e sa i pour elevaz zannimo ki’n idantifye Amitie e ki ankor dan prosedir ganny divize avan fer alokasyon avek fermye.

Laplipar bann later ki ganny vwar konman lib i bann ki annan lease lo la me kot prodiksyon pa alaoter.

“Nou plan pour bann later ki pa pe prodwi se pour fors bann ki annan lease pour fer prodiksyon ki rekonmande e sa i konsern 80% prodiksyon. Lot letap si napa prodiksyon, departman Lagrikiltir i repran sa bann later e donn avek lezot dimoun ki kapab fer sa louvraz e ki satisfer kriter. Nou estimen ki si tou bann prosedir i ganny  aplike dapre lareg, ziska 25% bann later lo Praslin i kapab pas dan sa tel prosedir,” Minis Joubert in fer resorti. 

Me i dir i annan plizyer fakter ki met retar ek sa prosedir e sa i enkli bann assets ki lo later parey batiman ek lezot, konplikasyon avek lagreman e osi bann notis ki ganny donnen avek fermye e osi bann sitiasyon kot i annan dimoun ki pe reste lo later lagrikiltir.

“Aktyelman departman in fini konplet lalis levanter e lalis bann dimoun ki pe reste lo later lagrikiltir lo Praslin e nou pe zis esper en lalis sorti kot Minister Later ki osi annan plizyer later ki in lease direk avek bann prodikter e sa i vedir ki pa tou later ki’n lease pour lagrikiltir ki dan lanmen departman Lagrikiltir me i annan ki pe ganny  administre direkteman avek Minister Later,” Minis Joubert in fer resorti.

I dir sa bann later pou transfer kot son minister pour ki departman Lagrikiltir i kapab administre e pran aksyon avek bann dimoun ki pa fer prodiksyon alaoter.

Minis Joubert ti donn tou sa bann lenformasyon letan i ti pe reponn en kestyon demande par MNA LDS Doyace Porice ki ti anvi konn plan minister pour bann later lagrikiltir ki ankor lib e osi ki progranm minister pe fer pour ed bann fermye lo Praslin anmenn plis prodiksyon?

Lo sa dernyen pwen Minis Joubert in eksplike ki departman Lagrikiltir pe revwar plan prodiksyon e analiz bann difikilte ki bann fermye pe fer fas avek e kontinyen travay pros avek zot pour asire ki zot valoriz byen zot later pour ogmant prodiksyon.

I dir ki anmenmtan zot pe osi get bann fasilite pour siport letablisman ek kontinyasyon bann laferm.

I’n fer resorti ki zot in deza koz lo sibvansyon pourzannimoe osi proze pour sa nouvo labatwar ki anmars.

An sa ki konsern bann lezot demars ek sipor ki pe ganny fer pour asir prodiksyon agrikol lo Praslin Minis Joubert in donn sa bann laspe swivan; ogmant kapasite bann travayer ki donn servis sipor bann fermye legim ek prodikter zannimo, devlop en sistenm rikord pour kliyan pour ranplas en sistenm manual filing, ogmant konnesans bann prodikter agrikol pour ki zot kapab fer fas avek bann defi dan zot loperasyon.

I deza annan bann formasyon lo maladi plant e ESA in deza konfirmen ki i pou fer formasyon dan zesyon finans ek biznes pandan 3enm kar sa lannen e sa pou ganny ofer avek bann fermye enkli bann lo Praslin. Konnesans teknolozik i osi enportan e Minis Joubert in dir ki i deza annan de propozisyon proze ki servi nouvo teknolozi lo Praslin e enn in deza ganny later plis promoter pe ganny ankouraze pour vin devan pour ogmant prodiksyon e transfer konnesans avek bann fermye lokal.

Kot i konsern prodiksyon zannimo, Minis Joubert i dir en nouvo sit Amitie pe al ouver e en semen in fini konmanse pour al kot sa sit ki annan kapasite pour set nouvo laferm zannimo. Anmenmtan i dir zot pe osi adres bann ka prodiksyon zannimo dan lezot landrwa pour asire napa presyon pour bann prodikter fermen ouswa bouz zot bann loperasyon.  

Kot i konsern supplies ek inputs, konplentkonsernan bann stor i kontinyel e provizyon i bezwen kontinyen ganny fer pour asire bann fermye i ganny akse avek materyo.

“Sa departman pe travay lola e sa mwan menm ansanm avek Procurement Oversight Unit nouvo desizyon pe ganny fer lo kote pour sours materyo akoz avek sistenm aktyel i annan bokou problenm avek bato e i pa fasil pour renouvle stok lo en baz kontinyel e sa i bezwen ganny adrese dan en fason irzan. Nou osi annan en latas pour moderniz bann prodwi ki kontrol pes pour asire fermye i ganny meyer ek kalite prodwi pour zot sekirite. Minister pe osi fer zefor pour siport value chain e deza zot in tonb dakor avek SFA pour ki departman Lagrikiltir i fer en laboutik legim ek lavyann kot bazar Baie Ste Anne e sa in deza preski fini konplete, nou’n siny en lagreman pour en fasilite chilled storage ki fonksyonn avek lenerzi soley e pou annan 2 younit e nou ekspekte ki enn ava ganny plase lo Praslin pour benefisye bann fermye legim e deza 50 mil dolar in pare pour li. Nou pe esper konfirmasyon later lo Zil Eve pour elabor plis lo sa proze e osi bann lezot proze ki annan pour fer avek value chain dan lagrikiltir ki kapab enkli processing, stokaz e osi lavant prodwi lo Zil Eve kot nou’n ganny dir nou pou ganny en bout later me nou pa ankor ganny konfirmasyon kote e ki grander akoz lazans ki responsab later endistriyel i ankor pe fer en travay pour organiz sa landrwa e met anplas bann lenfrastriktir neseser,” Minis Joubert in fer resorti.           

Marie-Anne Lepathy