Minis Fonseka, zofisye SFRSA i reponn kestyon lo dife Le Chantier Mall |28 October 2021
Minis pour Zafer Entern Errol Fonseka in dir dan Lasanble yer bomaten ki vi logmantasyon enkyetan dan bann ka dife dan pei i neseser ki tou bann partener e responsab konsernen i bezwen pran zot responsabilite e vin pli serye ki oparavan e ranforsi bann mezir prekosyon pour sekiriz bann batiman ek propriyete.
Minis Fonseka ti dir sa letan i ti pe reponn en kestyon irzan lo dife resan dan Le Chantier Mall poze par manm parti minoriter Wallace Cosgrow.
Minis Fonseka in fer resorti ki pandan sa lannen ziska la in annan plizyer sitiasyon dife e 21 lapel dife zis pour sa mwan tousel e apepre 254 lapel pour sa lannen ziska la.
«I kler alors ki sa sitiasyon dife nou bezwen pran li pli serye ki oparavan e ranforsi bann mezir prekosyon pour sekiriz bann batiman ek propriyete,» Minis Fonseka in dir.
Minis Fonseka in profite pour remersye bann zofisye Lazans Servis Tenny Dife ek Sovtaz (SFRSA) pour kapab met sa dife anba kontrol atan.
Lo son kote sef zofisye tenny dife, Msye Andre Morel, in fer resorti ki SFRSA ti deploy de fire tenders avek en bowser e anviron 50 zofisye e sa ti enkli detrwa zofisye ki’n deza kit SFRSA par pran zot retret oubyen demisyonnen enkli ansyen sef zofisye tenny dife Msye Eddy Payet.
«Prensip tenny dife oubyen mitigasyon en lensidan dife i ki ou deploy resours neseser e ou azout lola letan i neseser. Sa dife ti ganny met anba kontrol dan 25 a 30 minit e dife pa’n propaze pour afekte lezot konpartman dan sa batiman alors ti napa okenn nesesite pour azout lezot resours a sa moman.
An sa ki konsern bann difikilte ki SFRSA ti rankontre pour kapab met sa dife anba kontrol, Msye Morel in dir ki sa lazans pa’n rankontre okenn difikilte me si sa batiman ti annan tou bann fasilite ki SFRSA ti rekonmande dan son fason konstriksyon, sa ti pou’n fasilit travay sa lazans.
Sa i bann fasilite parey en ‘riser’ ki ti pou ede redwir longer rakor ki bann zofisye ti pe sevi pour anmenn dan sa batiman.
Msye Morel ti eksplike ki en ‘riser’ i en kalite tiyo ki nou rekonmande i ganny enstale dan bann batiman e i annan de kalite ‘riser’. En ‘wet riser’ ki li i ganny mete pour fer ki dan sak konpartiman en batiman i annan en outlet avek bann rakor anplas pour ki letan i annan en lensidan vitman bann zofisye tenny dife zot pa bezwen trenn rakor me mont direk kot dife i ete e konmans konbat li. I osi annan ‘dry riser’ ki li bann zofisye tenny dife i bezwen konekte delo ek sa tiyo pour mont anler.
Dan en kestyon siplemanter Onorab Cosgrow ti anvi konnen akoz bann zofisye tenny dife pa ti servi sa kanmiyon avek sa gran leskalye ki sa lazans ti’n aste pa tro lontan pase zisteman pour konbat dife dan bann batiman plizyer letaz.
I ti osi fer resorti ki sa batiman ti anba en kantite renovasyon e si pandan sa letan SFRSA ti’n fer bann rekonmandasyon e bann swivi baze lo sa bann rekonmandasyon pour evit bann sitiasyon difisil pour zofisye tenny dife.
An sa ki konsern bann rekonmandasyon, depite sef zofisye tenny dife Msye Regis Bethew ti eksplike ki tou bann batiman ki ganny konstrir i bezwen swiv serten prosedir ‘occupancy’ lo ki tou bann parti konsernen i apre donn zot komanter e rekonmandasyon avan ki Lotorite Plan i donn ‘occupancy’.
“Pour sa batiman firebrigade ti siport ‘occupancy’ pour ground, first and second floor e pour bann lezot floor pli o nou pa’n zanmen siport ‘occupancy’ akoz ti annan bann keksoz ki nou ti’n rekonmande e ki pa ti ankor fini mete sa i fer ki nou pa pou kapab konnen egzakteman akoz ki sa bann dimoun in ganny lotorizasyon pour servi sa batiman par lao dezyenm floor ki nou ti siporte pour servi,” Msye Bethew ti fer resorti.
Lo son kote Msye Jones Madeleine, zofisye relasyon piblik, ki osi responsab pour lenvestigasyon ek prevansyon kot SFRSA, ti eksplike ki sa kanmiyon avek sa gran leskalye ki zot ti gannyen an 2019 ti’n ler pour fer servis lola an Septanm sa lannen e ki depi an Me lannen pase zot ti’n konmans prosedir me malerezman servicing pa’n fer akoz sitiasyon Covid-19 pa’n permet ki bann teknisyen sorti Langleter i kapab vini. Me la konman Langleter in reouver, sa bann teknisyen sorti kot sa lakonpannyen pe vini le 7 Novanm pour vin fer sa bann servis neseser lo sa masin.
Minis Fonseka ti konfirm sa bann lenformasyon e i dir i satisfe ki vre zot in fer zot mye lo sa size.
Antretan konsernan rapor ki bann dimoun lo lezot letaz pli ba sa batiman ti pe kontinyen travay e ti napa okenn lide ki ti annan en dife dan sa batiman sa ti lev kestyon si tou bann lekipman kont dife ti annord. Minis Fonseka ti eksplike ki bann tel responsabilite i i lo propriyeter sa batiman e i osi dan zot lentere pour mentenir sa landrwa.
Lezot konsern ti lo lefe ki bann zofisye tenny dife i toultan servi delo e si sa i vedir zot napa fasilite pour servi fòm. Lo sa pwen Msye Bethew ti eksplike ki letan zot get sitiasyon zot ti konstate ki bann keksoz ki ti pe brile ti kapab tenny avek delo. I dir menm si zot annan fòm, i annan son moman spesifik pour servi li e zot ti pou’n fer li si zot ti vwar li neseser.
Marie-Anne Lepathy