Dan Lasanble Nasyonal |10 July 2021

Lanket i ankor pe fer dan ka bann Seselwa ki pe ganny detenir kont zot volonte an Mwayenn Oriyan

Minis pour Zafer Entern, Errol Fonseka, in konfirm sa 14 ka ki lo rikord lapolis kot bann Seselwa pe ganny detenir kont zot volonte dan bann pei Mwayenn Oriyan.

I’n osi rekonfirmen ki 7 ka ladan pe ganny travay lola e parmi i annan de ka ki’n fini konplete e finalize e enn ladan i kot Prokirer Zeneral tandis ki lot i deza devan Lakour kot en sispe in ganny sarze pour lofans trafik imen ki fer i pa kapab donn plis detay lola.

Minis Fonseka i dir ki pour rezon sekirite nasyonal ek sekirite serten bann endividi dan sa bann ka, i’n propoze ki i annan en rankont avek Komite Sekirite Nasyonal dan Lasanble pour diskit sa bann ka.

Me minis ti osi azoute ki dan sa 14 ka i annan zis sa 7 ka ki’n ganny rikorde pour Mwayenn Oriyan e pour lezot ka lotorite Seselwa napa rikord e pa konnen egzakteman kote zot ete.

Minis Fonseka ti donn sa bann detay dan Lasanble Mardi letan i ti pe reponn en kestyon par MNA pour Mont Buxton, Gervais Henrie, lo sa size.

Onorab Henrie ti anvi en kont randi lo sa size e osi i ti anvi konnen ki plan gouvernman pe fer pour fer zot retourn Sesel pli vit posib e sen e sof.

Dan en kestyon siplemanter Onorab Henrie ti anvi konnen kan ki premye fwa ki lotorite Seselwa ti ganny met okouran sa sitiasyon e kwa ki’n ganny fer avek lenformasyon ki zot ti annan partikilyerman pour enform bann fanmir ki enn zot manm i manke e zot pa konnen kote i ete.

Minis pa ti oule pronons son lekor lo sa pwen me i ti senpleman dir ki i ava kominik sa lenformasyon avek bann manm Lasanble plitar. Me an sa ki konsern enform bann fanmir, minis ti dir ki tou sa 7 ka ki zot pe adrese bann fanmir isi zot okouran lo ki pe arive.

Minis ti osi azoute ki i annan serten travay ki pe ganny fer avek lezot departman e ankor i pa ti oule al dan tro bokou detay.

Sitiasyon Covid-19 dan prizon Montagne Posée

Touzour dan lasanble sa semenn, Minis Fonseka ti dir ki servis prizon pe enplimant serten mezir pour zer e diminyen lenfeksyon Covid-19 parmi popilasyon prizonnyen.

I ti dir sa letan i ti pe reponn en kestyon lo sa size par MNA pour Anse Boileau, Philip Arissol.

Sa bann mezir i konm swivan:

- Tou bann travayer sa servis in ganny posibilite pour pran vaksen e sa ti konmans depi le 19 Zanvye sa lannen e aktyelman 90% bann travayer prizon in ganny vaksinen;

- Tou bann kondannen e bann dimoun ki an detansyon provizwar ti ganny zot premye doz vaksen le 18 Mars e dezyenm doz le 8 Avril. 95% bann kondannen ek deteni in ganny vaksinen;

- Vaksen pour bann ki vin lo rimann o fir e anmezir in konmans donnen apartir le 7 Me;

- Tou bann travayer, kondannen ek deteni zot ganny donnen mask e bann vizit pour kondannen in redwir;

- Bann travayer e osi bann nouvo kondannen ki antre zot ganny ‘screen’.

- Tou le semenn Sirentandan Prizon i fer en rankont pour diskit sitiasyon Covid-19 dan prizon e landrwa i ganny dezenfekte trwa fwa par zour toulezour;

- Dezenfekte lanmen ek lipye osi i ganny fer dan larantre e sorti bann fasilite prison;

- Bann nouvo kondannen ek deteni i ganny mete dan en zòn detansyon e karantenn e zot ganny sirveye avan zot finalman antre dan fasilite prensipal prison;

- En blok prizon i ganny servi konman en zòn izolatwar kan i neseser.

Minis i dir ki ziska prezan 66 kondannen e 2 dimoun lo rimann in ganny teste pozitiv pour Covid-19 e sa i reprezant anviron 25% pour en popilasyon prizonnyen an mwayenn 272. I annan 3 kondannen ki’n refize pran vaksen ouswa zot annan serten rezervasyon pour rezon lasante. I’n osi annan 40 travayer ki ti pozitiv e zot tou zot in refer.

Antretan Minis Fonseka in osi fer resorti ki i annan en dokter ki konsilte bann kondannen dan pti sant lasante prizon dan serten zour lasemenn e trwa ners ki vizit bann kondannen e osi administre metadonn toulezour e anmenmtan dan bann ka irzan prizonnyen i osi ganny admet kot sant lasante Anse Boileau kan i neseser.

Minis Fonseka ti osi reponn plizyer lezot kestyon konsernan son minister tel parey resours pour ranforsi kapasite bann stasyon lapolis, leta stasyon lapolis Anse Etoile ki’n fermen tanporerman depi le 19 Mars akoz sitiasyon Covid-19. Apre bann lenspeksyon ti dekouver ki sa batiman i enfeste avek mwasi, alor desizyon ti pran pour ki sa stasyon i fermen. Me depi le 16 Zen, en parti biro ladministrasyon sa distrik in ganny konverti pour abrit stasyon lapolis.

Marie-Anne Lepathy