Follow us on:

Facebook Twitter LinkedIn YouTube

National Assembly

Le de dirizan i demar deba lo ladres Prezidan Faure lo Leta Lanasyon avek zot larepons |26 February 2020

‘Dimoun in eksprim zot mekontantman avek serten pwen,’ Msye Ramkalawan i dir

 

  • ‘En diskour laverite e fran,’ dapre Msye de Commarmond

 

Dan son larepons lo SONA devan Lasanble Nasyonal yer bomaten, dirizan lopozisyon Msye Wavel Ramkalawan in dir ki parey tou Seselwa li osi in ekout bokou bann reaksyon piblik e bann reaksyon i montre ki sa pep i ekoute e i entelizan e ki i nepli ler pour anvoy nenport kwa avek li.

Msye Ramkalawan i dir bokou dimoun in eksprim zot mekontantman avek serten pwen, demann bokou kestyon lo kote larzan pou sorti pour bann proze ki’n anonse oubyen propoz serten alternativ pour nou pep ek nou pei.

Msye Ramkalawan ti fer resorti ki enn bann pli gran leson ki in tire dan sa SONA 2020 se ki pour en pei avanse fodre i annan en plan serye. I dir ki malerezman Msye Faure pa’n montre nou en larout ki nou bezwen pran e i pa’n osi vreman adres bann vre defi ki nou pep pe fer fas avek ozordi. Si vreman sa gouvernman ti annan en plan konkret e serye, i pa ti a bezwen vin prezant en dezyenm bidze dan lespas trwa mwan, spesyalman kot nou vwar dezyenm i retir serten keksoz ki ti dan premye. I malere pour vwar ki nou pou bezwen rantre dan en legzersis finansyel tre byento dan dezyenm kar 2020.

Lo kote sitiasyon ekonomik nou pei, Msye Ramkalawan i dir i kapab vreman vin dan mal e si nou pa fer atansyon sanksyon serye i kapab ganny mete lo Sesel e dapre bann eksper nou menm kapab perdi nou fasilite ‘correspondence banking’. Sa i vedir prensipalman ki nou riske pa kapab transfer larzan deor pour tou nou bann bezwen tel parey lenportasyon manze, biznes eksetera. Sa i vin apre ki Sesel olye ganny retire lo blacklist La France in ganny azoute lo blacklist Linyon Eropeen.

Msye Ramkalawan i dir lo sa size, Msye Faure in mank loportinite pour adres sa size ouvertman e menm fer en analiz lo kwa ki i pe propoze.

Msye Ramkalawan in osi fer resorti ki Sesel in osi ganny nonmen dan en fason negativ dan konferans lapres White House Lanmerik dan menm konteks offshore e ki tou sa bann keksoz i tre enportan e ti’n devret ganny adrese par Msye Faure pour reasir pep Seselwa.

Msye Ramkalawan in demande ki en deba nasyonal serye lo sekter finansyel i bezwen ganny fer pour met o kler son lenportans dan nou lekonomi, kwa dan lalwa ki gouvern sa sekter ki bezwen ganny revwar pour ki nou evit bann sitiasyon parey, pour osi analize ki aksyon ki gouvernman pa pe fer ki pe afekte nou, si nou pe senpleman ganny abize par bann pei ki pli for, e si wi, ki larepons efikas ki Sesel i bezwen donnen.

Sitiasyon COVID-19 oubyen coronavirus i en lot size ki Msye Ramkalawan i dir Msye Faure ti’n devret adrese pour met nou pep lo alert vi ki sa maladi in deza montre son lenpakt lo lakantite viziter ki pe kennsel zot konze Sesel.

Lo size drog Msye Ramkalawan i dir i en lot gro size ki tou dimoun i koz lo la me ki Msye Faure pa’n vreman adrese e ki i vreman trakase akoz i resanble ki gouvernman i satisfe zis pour mansyonn progranm methadone, me ki napa ase ki pe ganny fer pour anpes nouvo zenn tonb dan sa latrap e lager kont lenportasyon drog dan nou pei e ki fodre ki nou pei i ranport laviktwar lo drog.

Lo size fer prodwi larises e fason biznes i ganny fer isi Sesel, Msye Ramkalawan i dir ki bann sif prezante par Minis Finans lo poursantaz biznes ki pey taks i ankor sokan e i kler ki en keksoz serye i bezwen arive dan sa partenarya.

Msye Ramkalawan i dir ki i neseser pour reviz bann prosedir pour etranze vin fer biznes isi e pour regarde dan ki domenn zot kapab antre.

Lo size pri lavi e lanons Msye Faure pour retir VAT lo manze, Msye Ramkalawan i dir sa mezir pa al ase lwen.

«Msye Faure ou devret donn en lord STC pour aret servi ‘middlemen’, me pour aste komodite direkteman e deswit pri manze i ava desann par 15-30%, si pa plis,» Msye Ramkalawan in dir.

An sa ki konsern sa bàn lo bourzwa, Msye Ramkalawan i dir ki biznes Seselwa ki’n ganny lankourazman pour devlop nou lekonomi ble i bezwen ganny konsilte letan serten desizyon ki pou afekte zot direkteman i ganny pran e en bàn pa kapab ganny anonse la pour la.

Lo size pri enternet, Msye Ramkalwan i dir fodre pa anbet Seselwa e ki Sesel i ankor tro ser me nou kapab fer pli byen.

Pour sa ki konsern bann lanons avek lenplikasyon finansyel ki’n ganny fer, Msye Ramkalawan i dir i ti a kontan ki nou ganny leksplikasyon lo kote sa bann larzan pou sorti e kan ki nou pou ganny sa bidze siplemanter. I ti osi demande ki parol i ganny swiv par aksyon ek desizyon serye.

Parmi bann lezot pwen ki Msye Ramkalawan i dir i merit bokou latansyon me ki Prezidan Faure pa’n touse i konsern nesesite pour Sesel annan en Gard Lakot byen ekipe pour protez nou kont lapes ilegal ek drog prensipalman, en nouvo lalwa ki pou donn sa lafors plis lotorite i bezwen ganny formile e rol larme lo later i bezwen ganny revwar, ki mannyer serten zil i kapab fer en pli gran kontribisyon ekonomik pour nou pei, parmi plizyer lezot pwen ankor.

En diskour laverite e fran

 

Lo son kote dirizan zafer gouvernman dan Lasanble Nasyonal, Msye Charles de Commarmond, in dekri ladres Prezidan Danny Faure lo Leta Lanasyon ki i ti fer Zedi pase devan Lasanble Nasyonal konman enn ki’n donn vre leta Nasyon Seselwa.

«I’n en diskour ki’n al oprofon e non pa zis kot nou ete ozordi, me osi kot nou ti ete yer. Sa diskour in montre diferans kot nou sorti e la kot nou’n arive. Sa diskour i en diskour la realite. Sa diskour i en diskour avek bann fe. Sa diskour i en diskour laverite e fran,» Msye de Commarmond in dir.

I ti fer resorti ki li, parey bokou dimoun, in byen akeir sa ladres Prezidan Faure akoz sa diskour i enn ki montre ki Prezidan Faure i annan son ledwa lo pou son nasyon e ki i ofe avek tou devlopman dan Sesel.

Letan i ti eksprim son lapresyasyon pour progre ki Sesel in fer dan domenn formasyon profesyonnel lasante par egzanp, Msye de Commarmond i dir sa i akoz sa gouvernman i krwar dan devlopman son lazenes.

I ti fer resorti ki lakaz ki ti en defi 30-an pase i ankor en defi ozordi e sa i akoz gouvernman United Seychelles pa krwar dan pti payot, ni dan lakaz fey koko, ni dan ghetto, ni dan lakaz plastik parey nou bann pei vwazen.

Msye de Commarmond ti fer resorti ki lakonplisman nou pei ek nou pep i en realite e i rezilta travay dir tou Seselwa.

Msye de Commarmond in osi byen akeir bann mezir parey pour rekonpans bann ki’n travay dir e sa pour fer ki aparti le 1 Zen sa lannen peyman minimonm pansyon pou sorti mil roupi e pou vin 3 mil roupi.

Msye de Commarmond i dir sa mezir pou tous lavi anviron 2473 dimoun ki’n pran zot retret e ki pe ganny en pansyon peye e finanse par Fon Pansyon.

Mezir pour redwir kou lavi pour ki enkli STC vann komodite menm pri lo Praslin ek La Digue, sipor pour bann paran ki annan zanfan dan day care, pri enternet parmi lezot, tousala Msye de Commarmond i dir in ganny byen akeir e i montre bon planifikasyon gouvernman e progre ki pei pe kontinyen fer.

(Lir larepons entegral le de liders lo paz milye nou edisyon ozordi).

 

Marie-Anne Lepathy

 

 

More news