Kominike Lapolis |14 October 2025
En zonm i mor dan aksidan larout anvil
Lapolis in rikord nevyenm ka aksidan fatal pour lannen 2025.
Sa i en zonm sorti dan distrik Perseverance e ki prezimen dan son karantenn lannen.
Dapre rapor inisyal ki lapolis in ranmase, sa zonm ti pe travers semen lo Lari Konstitisyon anvil o moman sa aksidan. I ti ganny tape avek en bis prive ki ti pe al direksyon ver lavil. Lapolis ti ganny alerte lo sa aksidan ver 10er 45 Dimans swar pour lasistans.
Inisyalman lapolis ti’n fer sorti en lanons dan lannwit pour demann fanmir ou zanmi pour idantifye sa zonm baze lo son laparans ek lenz. Lapolis in konfirmen ki zot in reisi ganny kontak avek fanmir sa viktim.
En lanket in konmanse an atandan rapor letopsi, pour determin lakoz e etablir sirkonstans otour son lanmor.