Kominike lapolis |26 March 2026
Kominike lapolis
Kat zonm i an detansyon koman sispe pour lofans drog
Kat zonm aze ant 23 a 60an sorti Persévérance ek Corgat Estate pe rimann an detansyon lapolis pour 14 zour, koman sispe dan sa bann ka swivan ki lapolis pe fer lanket ladan:
• Trafik en drog kontrole.
• Konplo pour trafik en drog kontrole.
• An posesyon en drog kontrole.
• An posesyon en drog kontrole avek lentansyon pour trafike.
• Blansisaz Larzan.
Swivan en loperasyon ki lapolis ti fer le 22 e le 23 Mars 2026, Persévérance e Corgat Estate, 292 granm eroin, 180 granm cyrstal meth (Methamphetamine) e en sonm en pe plis ki 120 mil roupi ti ganny sezi.
En etranze i ganny sarze pour lofans relye avek drog
Carlos, Eduardo Rocha aze 33-an in formelman ganny sarze devan Lakour Siprenm Lendi le 23 Mars 2026 pour lofans lenportasyon en drog kontrole.
Sa zonm avek nasyonalitye Bolivyen, ti ganny entersepte lo Erport Enternasyonal Sesel par bann zofisye lapolis e ladwann, apre son larive abor en vol Emirates sorti Antananarivo, Madagascar le 21 Fevriye 2026. Swivan lafouy, lapolis ti sezi serten sonm larzan dan diferan dominasyon, e en total 3859.3 granm cocaine.
Lanons semen fermen
Motoris pe ganny enformen ki semen St Louis, Dan Koko pour parsyelman fermen ozordi Zedi le 26 Mars 2026, aparti 9er bomaten, pour anviron 1erd-tan.
Sa pou permet lapolis ek lezot lazans konsernen fer en travay ‘survey’ an relasyon avek sa 13enm ka aksidan fatal ki ti arive le 30 Desanm 2025. Pandan sa peryod letan, motoris pe ganny averti pour servi semen alternativ pour ariv zot destinasyon.
Departman lapolis i demann korperasyon bann motoris, avek son bann zofisye ki pou lo semen ki pour pe kontrol mouvman trafik.
Kominike sorti kot departman lapolis