Mesaz Prezidan Larepiblik pour Lazournen Redwir Obesite |04 March 2025
Prezidan Ramkalawan
‘Gouvernman pou kontinyen siport tou aksyon pour redwir obesite’
Prezidan Wavel Ramkalawan in dir ki i reaffirm langazman solid gouverman Sesel pour kontinyen siport tou aksyon pour redwir obesite, e anfezan sa, redwir maladi e ogmant byennet ek prodiktivite ekonomik nou pei.
Prezidan in dir sa dan son mesaz pour Lazournen Enternasyonal Redwir Obesite.
Mesaz entegral Prezidan Ramkalawan i lir koumsa:
“Depi mon ti lans kanpanny nasyonal pour redwir obesite dan nou popilasyon adilt ek zanfan par
apepre 2% par lannen 2030, in annan en konsyantizasyon remarkab dan nou sosyete lo sa size
obesite e lo ki mannyer obesite i afekte lasante.
“Ozordi nou tou nou konnen ki obesite i antrenn dyabet, tansyon, latak leker, latak laservel, maladi
ronnyon e plen lezot maladi ankor. Nou konnen ki i osi asosye avek kanser e ki tou sa bann maladi i
kapab okazyonn lanmor prematire ek dezabilite. Sa bann maladi ek kondisyon zot osi redwir nou
prodiktivite ekonomik e zot kout lasosyete en kantite resours pour sonnyen.
“Ler nou ti met sa target pour redwir obesite par 2%, serten ti dir ki i tro anbisye e ki nou ti devret
zis esey fer to obesite pa mont plis ki sa ki ti ete an 2023. Sa ti baze lo leksperyans lezot pei ki ti’n
vwar li tre, tre difisil pour redwir obesite se zot. Me nou, nou ti determinen e nou ti met labar
relativman o.
“Lankourazman ek satisfaksyon ki mon santi ozordi, apre enn an edmi sa kanpanny, se ki tou
dimoun isi Sesel i konnen aprezan ki i pa bon ler en dimoun i tro gro. I annan en gran kantite
dimoun ki toulezour pe vreman seye avek bokou zefor pour perdi pwa. Mon kapab dir, san
ezitasyon, ki sa kanpanny pe marse lo sa nivo. E mon demann nou tou pour kontinyen sa bann zefor
eksepsyonnel ki nou pe deza fer. Annou kontinyen angaz nou, avek ankor plis entansite, dan bann
aktivite fizik ki organize dan bann landrwa travay, dan distrik, dan fanmir e dan bann lekol.
“Sepandan, mon bezwen met lanfaz lo lefet ki menm si legzersis e aktivite fizik i neseser pour
redwir obesite, zot pa sifizan, lo zot menm. Nou bezwen osi reaziste sa ki nou konsonmen, savedir
sa ki nou bwar e manze, toulezour. Nou bezwen redwir lo volim tou sa ki nou konsonmen e ki nou
konnen pa bon pour lasante. Annou evite konsonm sa ki tro dou, tro sale e tro gra e sa ki annan
lalkol ladan. Annou evite manz an ekse, sirtou bann manze parey pizza, spageti, diri, dipen, ki
bokou tro ris an idrat karbonik e ki nou lekor, ler i pa kapab bril tou, i zis konverti sa e i stok li
konman lagres e la, nou war nou vant i konmans gonfle. Annou okontrer manz byen nou pwason,
nou legim, nou bred lokal, nou satini etc. Nou bann fermye ek peser pe fer bokou zefor pour met
tou sa la a nou dispozisyon. Sa bann manze, zot pa bann manze lamizer, parey serten i kontan dir,
me okontrer zot bann manze ki annan tou sa ki neseser pour gard nou an bonn sante. Annou prefer
zot, e annou manz plis sa ki bon pour lasante. Si nou pa sanz kalite ek kantite keksoz ki nou manze,
nou pa pou kapab redwir obesite dan en fason dirab, menm si nou fer en pe legzersis tanzantan.
“Ozordi alokazyon Lazournen Enternasyonal pour Redwir Obesite, mon reaffirm langazman solid
gouverman Sesel pour kontinyen siport tou aksyon pour redwir obesite, e anfezan sa, redwir
maladi e ogmant byennet ek prodiktivite ekonomik nou pei.”