Claire Coutts i selebre son 102enm lanniverser |12 January 2024

Madanm Coutts pe koup son gato lanniverser

Par Patrick Joubert

Claire Coutts, en rezidan kot Kouvan St Elizabeth dan distrikt English River, ti selebre son 102enm lanniverser yer.

Sa ti dan en pti seremoni ki ti deroul yer apremidi kot sa kouvan kot i pe reste pandan sa dernyen 4-an.

Prezan kot sa seremoni ti manm fanmiy, zanmi ek serten rezidan, osi byen ki Minis pour Gouvernman Lokal ek Zafer Kominoter, Rose-Marie Hoareau; manm Lasanble pour English River, Onorab Andy Labonte; administrater distrik, Jancy Volcère; reprezantan departman Lafanmiy dan Minister Lazenes, Spor ek Lafanmiy, osi byen ki reprezantan twrazyenm-az.

Madanm Coutts ti resevwar plizyer kado sorti kot lafanmiy ek lezot prezan e parmi ti en hamper sorti kot Prezidan Wavel Ramkalawan prezante par Minis Hoareau, en bouke fler ek en gato par lotorite distrik prezante par Onorab Labonte ek en hamper sorti kot departman lafanmiy. 

Ler i ti koz avek medya, Madanm Coutts ti dir ki i byen kontan in ariv sa laz, en keksoz ki i pa ti ekspekte.

I ti azoute ki in ase byen fer dan son lavi pour gard li an bonn sante e ganny sa respe.

“Mon kontan. Mon vwar ki tou dimoun i respe mwan e mwan osi mon respe zot. Mon krwar mon’n ase byen fer e mon osi remersye zot pour sa ki zot in byen fer pour mwan. Zot in byen respe mwan e mon osi mon’n byen respe zot. Mon dir zot mersi pour sa,” Madanm Coutts ti dir.

Ne Claire Agnes Ah-Kong, Madanm Coutts i parmi trwa santener ki’n selebre zot lanniverser sa mwan apre Antoinette Barrack ki ti selebre 105-an le 8 Zanvye, e  Noemie Beniot ki ti selebre 108-an le 2 Zanvye.

Madanm Coutts, ki ti ne le 11 Zanvye 1922, ti grandi Anse Louis pandan son zenntan avan ki i ti bouze pour vin reste pli pros ek lavil ler i ti en adilt. Vi ki i ti en koudriyez talante e i ti tre devoue ladan, Madanm Coutts ti pran sa konman son metye e pratik li pandan plizyer lannen son lavi. I annan zis en garson, Justin Mémée ki aze 81-an, osi byen ki en pti zanfan e de aryer pti zanfan.

Msye Mémée ti dir ki apard en memwar kourt parler, son manman i an bonn sante e i pe ganny byen okipe la kot i ete. I ti fer remarke ki son manman pa’n en dimoun ki trenn malad e se sa ki i krwar in ed li pour ariv sa laz. I dir i rann li vizit tou le semenn.

“Mon swete ki i kontinyen reste an bonn sante e ki Bondye i ed li pour reste fizikman ‘fit’ parey i ete la, pa plis, pa mwens. Fotespere i kontinyen ganny sa bon tretman la kot i ete e ki i pa fer dominer avek zot,” Msye Mémée ti dir an riyan.

Dapre Msye Mémée, bann granpye son manman i bann desandans Sinwan kot parmi son granper ti viv pour 106-an. I ti eksplike ki son manman in ganny sa sinyatir Coutts apre ki i ti marye avek son boper, en zofisye larme ki sorti Lekos, tar dan lannen swasant. I ti fer remarke ki li osi (son boper) i annan zis en sel zanfan, en garson parey son manman, e son papa, Marc Mémée, ki pa ti’n marye e reste avek son manman, ti mor ase zenn boner dan bann lannen swasant.

Sete per Yves sorti Legliz Katolik ki ti donn benediksyon ek lakonminyon Madanm Coutts. 

Nou seleksyon portre i montre enn de moman for sa seremoni yer.

Portre par Patrick Joubert