Arid i demann tolerans ek linite ant sitwayen ek politisyen |29 March 2025

Lasosiasyon pour Drwa, Lenformasyon ek Demokrasi (Arid) in donn son pozisyon lo sa lensidan lo rezo sosyal ant en sitwayen ek en manm Lasanble Nasyonal.

Swivan sa lensidan in annan plizyer pwennvi ek refleksyon enkli sipor anver swa sa sitwayen e ou kote manm parlman. Anrezilta sa, Arid I fer rapel ki :

1. Okenn form labi – swa verbal, fizik, labi iminite parlmanter, labi pozisyon, labi nou drwa a lekspresyon e labi resours leta – i kont prensip nou konstitisyon e nou bann valer sosyal e kiltirel konman en pep.
2. Sitwayen i lib pour partaz son lopinyon ek fristrasyon kont bann ki dan pozisyon enportan e bann o-zofisye lo fason zot desarz zot fonksyon, desizyon ou deklarasyon ki zot fer dan zot kapasite ofisyel. Sepandan sitwayen i merit egzers sa drwa san ki zot abiz drwa sa lot dimuon.
3. Politisyen i merit mentenir en o-nivo kondwit, donn legzanp e annan tolerans pour lopinyon ek reaksyon sitwayen menm si parfwa bann tel reaksyon i kapab paret ofansif.
4. Politisyen pa merit enstig reaksyon ki pou kapab ofansif, e pa abiz zot iminite parlmanter.
5. Sitwayen ek politisyen i merit annan respe, montre tolerans e rezet okenn form lagresyon ki al kont linite nasyonal e nou bann valer sosyal

Arid pe demande ki sakenn de nou, me sirtou bann politisyen, i evite fer bann aksyon ki pou diviz nou nasyon. Arid i kondann okenn aksyon pour kree divizyon e demande ki nou promot lape, tolerans ek respe sirtou pandan sa moman eleksyon.

Kominike sorti kot Arid