Madanm Claire Coutts i selebre son 101enm lanniverser |12 January 2023

Madanm Claire Coutts in selebre son 101enm lanniverser yer.

Sa santener, ki’n en rezidan Kouvan St Elizabeth pandan sa dernyen 3-an, ti selebre sa gran zour atraver en pti seremoni organize par bann manm fanmiy ek bann zanmi, ansanm avek Minister Gouvernman Lokal ek Zafer Kominoter.

Prezan pour swet Madanm Coutts en bon lanniverser e pour selebre avek li ti Minis Rose Marie Hoareau; manm Lasanble pour English River Andy Labonte; direkter dan Divizyon pour bann Dimoun Aze Liz Cadeau; administrater distrik Jancy Volcère; osi byen ki bann travayer ek rezidan kot Kouvan.

Madanm Coutts, ne Claire Agnes Ah-Kong an 1922, in en koudriyez devoue pandan laplipar lannen son lavi. I ti ne e grandi Anse Louis, avan ki i ti vin reste pli pros avek lavil pandan son bann lannen adilt.

I annan zis en garson, Justin Mémée ki aze 80-an, osi byen ki en pti zanfan e en aryer pti zanfan.

“Mon kontan. Mon’n byen pase,” Madanm Coutts ti eksprimen.

Son garson, Msye Mémée, ti eksplike ki son relasyon avek son manman i plito parey de gran zanmi, kot zot koze e diskit nenport kwa.

I dekrir son manman konman en dimoun ki kontan fer aksyon plis ki i kontan koze, e ki toultan pare pour ede otan ki en dimoun i dir mersi.

I rapel bann moman ki i ti ankor zanfan kot son manman ti koud e ti annan bokou kliyan, kot i ti vwar li pe menm sey bann rob pour bann kliyan. Pandan 1962, Msye Mémée ti kit Sesel e bouz Langleter kot i ti zwenn larme, e i ti retourn Sesel an 1999.

Pandan son labsans, son manman ti marye avek en zofisye larme ki sorti Lekos (Scotland), ki fer ki i’n ganny sa sinyatir Coutts.

“Pour le moman i napa okenn maladi, e son memwar lon-term i ankor bon kot i mazin bann keksoz ki’n arive plizyer lannen pase. I en dimoun ki ti toultan kontan kit son lekor okipe,” Msye Mémée ti dir.

Bann granpye Madanm Coutts i bann desandans Sinwan, e dapre son garson, granper Madanm Coutts ti osi viv pour vwar 106-an.

Vi ki Msye Mémée avek son madanm ti’n al Sri Lanka resaman pour serten rezon medikal, ti annan posibilite ki i mank sa selebrasyon. Me bann zanmi pros ki ozordi ganny konsidere konman bann manm lafanmiy Madanm Coutts, Rachel Aglae avek son msye, in zwe en gran rol anver lorganizasyon sa pti selebrasyon ki ti deroule yer.

Minis Hoareau, ki’n osi en zanmi lafanmiy Madanm Coutts pandan plizyer lannen, ti dir ki i en plezir pour ganny sans selebre sa gran lanniverser Madanm Coutts avek li.

“Ozordi i en zournen spesyal akoz mon frekant St Elizabeth osi dan sa group lasarite e volonter dan ki mon form parti, Soroptimist, alor mon byen familye avek tou bann dimoun ki la ozordi, akoz mon vin isi ase souvan,” Minis Hoareau ti dir.

“Dan mon sapo Minis, mon byen kontan ki mon’n vin la ankor parmi tou sa bann dimoun ki la, e i pli spesyal ankor akoz Madanm Coutts i selebre son 101-an e nou espere ki nou ava retournen pour son 102-an,” Minis Hoareau ti azoute.

Dapre Minis Hoareau, i annan apepre 15 madanm osi byen ki en zonm ki ekspekte selebre bann lanniverser par lao 100-an pandan sa lannen.

Nou seri portre i montre Madanm Coutts pandan selebrasyon son 101enm lanniverser yer parmi manm fanmiy, zanmi ek envite.

Laura Pillay

Portre: Emma Ah-kong