Dife i pran dan en laponp delo kot IPHS Ltd   |01 December 2022

Ler SFRSA ti ariv lo scene bann travayer IPHS ti’n fini tenny dife

Lazans Servis Tenny Dife ek Sovtaz (SFRSA) ti rann lapel yer apre midi kot Ile du Port Handling Services Ltd (IPHS Ltd) pour ede tenny en dife ki ti’n pran dan en laponp delo ki bann travayer ti pe servi pour fer serten travay dan en drenaz.

Dapre en zofisye sa lazans ki ti lo scene, Ricky Meme, sete ver 4er40 yer apremidi ki zot ti ganny alerte ki ti annan sa dife kot sa lakonpannyen.

Deswit zot ti anvoy en masin tenny dife avek en kanmiyon delo pourdonn lasistans.

I ti dir ki ler zot ti arive dan 3 ou 4 minit kounmsa, bann travayer IPHS ti’n fini tenny sa dife dan sa laponp e kot i ti’n konmans marse dan sa drenaz.

Anvi ki ti annan ankor lafimen ki ti pe sorti, zot ti servi delo ek foam pour pez sa lafimen. I ti fer remarke ki dan sa drenaz ti annan rakor dezyel parmi lezot rakor lezot prozwi kemikal ki ti kapab en danze si dife pa t’in ganny tennyen atan.

Patrick Joubert