Bann dirizan dan Lasanble i kondann konmater ki denigre travay Komisyon Laverite |18 September 2019

Travay ki Komisyon Laverite, Rekonsilyasyon e Linite Nasyonal pe fer i enn ki enportan ki toulede parti politik dan Lasanble in tonm dakor lola, ki pe ganny gide par en lalwa e ki’n ganny laprouvasyon legzekitif a alor dimoun napa okenn rezon e drwa pour denigre travay sa komisyon.

Sa ti sorti for dan Lasanble yer bomaten letan dirizan lede parti ti fermeman kondann bann konmanter ki dimoun pe poste lo medya sosyal ki zot dir i denigre e pa fer dibyen travay sa komisyon.

Dirizan zafer gouvernman, Charles de Commarmond, ki ti premye pour pran laparol, ti fer kler ki sa komisyon i endepandan e i pe fer en travay endepandan e bipartizan ki ti konmanse par en komite Lasanble e ki ti ganny laprouvasyon Prezidan Larepiblik ek Lasanble Nasyonal dan zefor pour ferm sapit lo bann levennman otour le 5 Zen 1977 e anmenn nou pep ansanm ver en lavenir avek plis linite.

“I annan zis apenn en semenn depi ki sa Komisyon Laverite, Rekonsilyasyon e Linite Nasyonal in konmans son travay e deza serten konmanter lo rezo sosyal e serten medya ek lezot miting pa pe fer dibyen travay ki sa komisyon pe fer e osi pour nou pei,” Msye de Commarmond ti dir.

“Mon oule alors lans en lapel tre for pour kondann sa bann move demars pour degrad e denigre travay enportan ki sa komisyon pe fer. Nou tou nou annan nou lopinyon ek pwennvi lo sa ki pe pase me serten konmanter ki mal pa pou fer nou dibyen. I byen nou demann nou pep pour swiv e obzerv sa ki pe pase ki normal, me nou bezwen vin pli realist e toleran e annan plis respe pour travay enportan ki sa komisyon in ganny demande pour fer. Silvouple pep Seselwa sa komisyon pe fer en travay endepandan, en travay pour anmenn fermtir lo bann keksoz ki’n arive dan nou pei e pour fitir nou zenerasyon, pour fitir nou pei e nou pep, mon beg pep Seselwa pour les sa komisyon fer son travay,” Msye de Commarmond in enplore.

Lo son kote dirizan lopozisyon, Msye Wavel Ramkalawan, in dir ki apre ki sa bann konmanter ti pe sirkile in yer kontakte Prezidan Danny Faure pour met sa a son latansyon e i’n fer resorti, parey Msye de Commarmond, ki travay sa komisyon i en travay ki toulede parti dan Lasanble e osi li Msye Faure konman sef legzekitif zot in agree lola.

Msye Ramkalawan i dir ki tou i konmans avek manm Lasanble zot menm pour aret gognard zot kanmarad manm lo sa ki pase dan sa komisyon.

I’n osi kondann dan en fason for sa remark kot en msye in konpar travay sa komisyon avek en telenovela. Msye Ramkalawan i dir sa msye, ki ti ne le 15 Desanm 1974, ti annan zis 3-an letan koudeta ti arive e alor i pa konnen e pa kapab konpar soufrans lafanmir Chang-Him avek en telenovela.

Msye Ramkalawan in demann li pour vin devan e prezant en leskiz avek bann dimoun ki’n deza pas dan bokou soufrans e ki ankor pe pas dan bokou soufrans.

“Si nou anvi bouz devan nou demande ki bann dimoun ki fer bann konmanter espesyalman bann zenn ki annan laspirasyon politik ki zot tou zot pran zot responsabilite akoz sa bann konmanter pa reflekte byen lo sa prosesis,” Msye Ramkalawan in fer resorti.

I ti repete e fer kler ki ansanm avek legzekitif, tou politisyen in dakor pour pas atraver sa prosesis pour kapab annan rekonsilyasyon.