Dan Lasanble Nasyonal - Deba lo Kod Sivil Sesel i al dan staz komite |12 September 2019
Apre ki Mardi bann manm ti’n vot lo merit e prensip zeneral prozedlwa pour moderniz Kod Sivil Sesel, yer pandan lazournen antye zot in diskit diferan pwen ki zot anvi sanze dan sa lalwa.
Zot in konmans fer sa dan staz komite. Pour permet ki bann manm e lezot dimoun andeor i kapab fer nouvo propozisyon apard sa ki ti’n deza propoze, ti neseser sispann serten standing orders Lasanble e sa ti posib anba Order 91(1) kot en mosyon ti ganny table e bann manm ti siporte 27 anfaver personn kont.
Spiker Nicholas Prea in apre lans en lapel pour ki tou dimoun ki annan lentere pour donn Sesel en bon Kod Sivil e osi nenport manm piblik ki annan serten konsern e anvi rod klarifikasyon pour fer li atraver zot manm Lasanble Nasyonal.
Manm piblik in osi kapab swiv lo lekran televizyon bann diferan lartik sa kod anmezir ki zot ti pe ganny amande.
Parmi bann pwen pertinan ki ti aborde dan deba yer ti definisyon miner dan lalwa. Dezorme en miner i en garson ou en fiy ki anba 18-an en pwen se tou e dan okenn sirkonstans par egzanp maryaz en paran pa pou kapab donn konsantman oubyen al rod konsantman devan lakour pour permet son zanfan anba 18-an marye.
Ti annan bokou deba lo sa pwen e Chantal Ghislain par egzanp ti demande si dan ka kot bann fiy anba laz i ansent e sa ki responsab i pli aze ki zot e anvi marye pour anmas zot e pran responsabilite sa zanfan, sa lalwa pa pou aprezan anpes zot pran zot responsabilite.
Largiman ki ti sorti i ki si en lansentman in arive sa ki responsab i ava pran son responsabilite san ki i bezwen marye avek sa fiy anba laz me i kapab espere ziska ler i ariv laz mazorite pour li fer son prop desizyon.
Dirizan lopozisyon Wavel Ramkalawan in dekri sa sanzman konman en gran lakonplisman pour Sesel akoz lefet ki sa provizyon in antre dan lalwa i vedir ki nou pei i aprezan anliny avek son bann lagreman enternasyonal lo proteksyon bann zanfan sirtou bann zenn fiy.
En lot pwen pertinan ki bann manm ti debat longman lo la ti konsern maryaz e son piblikasyon, kantite letan ki i ganny pibliye e kote pour permet dimoun letan vin devan pour fer okenn lobzeksyon, bann relasyon ki konsidere ensestye parmi lezot laspe relativ.
Deba lo Kod Sivil Sesel i kontinyen ozordi.