Dan Lasanble Nasyonal |20 June 2022

Manm i demann gouvernman pour vin pli serye, aplik lalwa pour adres problenm zanfan eran, manke

Bann manm Lasanble Nasyonal in donn zot sipor inanim en mosyon ki pe demann gouvernman pour vin pli serye e aplik lalwa dan bann sitiasyon kot zanfan anba laz pe eran dan bann kominote akoz mank responsabilite paran e osi kot zanfan i raporte manke e plitar ganny retrouve san ki okenn aksyon i ganny pran kont sa ki responsab.

Sete MNA Doyace Porice ki ti table sa mosyon ki orizinalman ti lir konm swivan: “Vi ki pei pe annan bokou problenm avek zanfan ki manke kot lakaz e ki bann zanfan anba laz ki lo semen apre 6er diswar i kapab en fakter, sa Lasanble pe demann paran pour pran zot responsabilite pour asir sekirite e deplasman zot zanfan pli byen e gouvernman pour asire ki lalwa ki adres sa de size i ganny aplike avek efikasite.”

Ler i ti prezant son mosyon e eksplik son rezondet, Onorab Porice ti dir ki i annan pour bi ed gouvernman revwar bann lalwa ki pe kre bokou konfizyon parmi nou pep espesyalman kot i konsern nou bann zenn zanfan e osi paran.

I dir i annan bokou zenn zanfan ki pe kit lakaz san permisyon ou konsiltasyon avek paran.

I dir Praslin ek La Digue pa’n ganny eparnye par sa problenm.

“Parfwa problenm i avek zanfan me parfwa osi problenm i avek paran akoz i annan paran ki pa konn zot priyorite vizavi zot zanfan. Zot soutir labi, kasyet laverite e pa pare pour ekout zot zanfan sirtou zot bann fiy.”

I dir bann zanfan i annan bokou move frekantasyon e zot les zot ganny antrennen dan bann lenflians ki paran pa kapab bare.

“Sa mosyon in vin a en moman kot bann madanm dan Lasanble fek diskit lo paran ek zanfan ki pe ganny abize e kot i annan problenm drog ek lalkol, vol, bandisite ek latak lo bann zanfan anba laz.”

Onorab Porice i dir ki konmela dan sak distrik e sou-distrik kot i annan bann housing estate ki anmenn ansanm plizyer kalite fanmir avek diferan mantalite e fason viv e nou pe vwar bokou lesefer kot zanfan i fer pour zot e serten paran pa pe kapab fer nanryen avek sa bann zanfan.

Onorab Porice i dir i konn byen sa bann sitiasyon akoz avan vin en manm Lasanble in travay dan plizyer distrik e preski partou i annan sa bann kalite problenm.

I’n fer resorti ki lontan bann paran ti serye e tre konsernen avek sa ki zot zanfan i fer e zot ti fer sir ki letan 6er diswar i sonnen tou zanfan ti’n fini antre kot lakour. Bann paran sa letan ti annan byennet zot zanfan aker e zot ti fer sir ki zot zanfan ti byen elve e annan respe pour tou dimoun e zot ti gard sa bon relasyon familyal e bon relasyon avek zot bann vwazen. Me konmela i rar kot ou vwar nou bann paran e osi zanfan pe viv parey lontan.

“Nou konnen ki i annan bokou paran ki travay pandan sa bann ler me sa bann paran pou bezwen vwar sekirite pour zot zanfan pandan zot labsans. Nou pe vwar bokou zanfan ki pe marse lo semen apre 6er kot zot pe osi enterfer dan bann keksoz ki pa konsern zot e zot pe ganny servi pour vann drog, sigaret e zot pe osi aprann vagabonde e paran pa konnen e pa pe ekspekte ki zot zanfan pe fer.”

Onorab Porice i dir ki bann keksoz ki serten bann zenn zanfan letan zot groupe ansanm dan bann housing estate zot fer i enkrwayab.

I dir menm si serten paran pe fer zot mye i annan serten pa pe realize ki nou bann zanfan i en bizou pour nou.

I annan zanfan ki zot paran i travay lotel e sa i fer ki zot travay shift, zot pa kot zot lakour pandan wikenn ek konze e i annan ki zot bann zanfan i konpran sa tre byen me atraver zot frekantasyon avek bann zanfan ki pa responsab zot ganny enfliyanse e zot lespri i sanze.

I dir ki lontan bann gran paran ti reste kot lakour e pran responsabilite bann zanfan apre lekol e letan zot paran ti al tavay me tousala in sanze aprezan.

I’n fer resorti ki avan ki mezir neseser i ganny pran avek sa bann paran ki pa pran zot responsabilite, gouvernman e tou bann lazans konsernen zot bezwen fer konsiltasyon avek bann paran e osi ekout konsern sa bann zanfan dan kominote.

I dir gouvernman i bezwen revwar bann fasilite ki egziste pour asiste bann paran parey daycare, servis childminding apre lekol parmi lezot pour asiste zot avek en landrwa konvenab pour kit zot zanfan.

I osi annan nesesite pour revwar bann progranm vakans pour pli byen ankadre bann zanfan dan letan vakans.

Lo son kote letan i ti entervenir lo sa mosyon, Onorab Regina Esparon ti fer resorti ki bokou dimoun ki annan larzan pe atir sa bann zenn zanfan dan toutsort kalite vis e abiz zot seksyelman apre donn zot bann gro keksoz materyel ek larzan. Sa i fer ki bokou sa bann zanfan sirtou bann fiy pe absante kot lakour zot paran pour detrwa zour kot zot ganny deklare manke avek lapolis. I dir sa ki pli enkyetan i ki souvan letan zot retournen nanryen pa ganny fer e napa okenn gran swivi konmsi sa i en keksoz normal e akseptab.

I dir ki fodre bann lalwa ki annan pour fer avek proteksyon zanfan i bezwen ganny revwar.

“I fer lapenn e regretab ki ziska prezan personn sa bann adilt ki pe abiz nou bann zanfan pa ankor ganny arete e pourswiv pour gard zanfan anba laz kot zot. I’n ler pour aksyon sever ganny pran kont sa bann tel endividi,” MNA Michel Roucou ti fer resorti.

Lo son kote MNA pour Cascade, Philip Monthy, ti fer resorti ki i malere pour konstate ki apre tou sa progre ki nou’n fer pandan tou sa bann lannen ki’n pase e tou sa bann striktir ki’n met anplas kote nou’n al mal?

Me i dir ki sa responsabilite ozordi i tonb lo gouvernman dizour pour fer keksoz si nou pa anvi retrouv nou avek en zenerasyon zenn ki’n perdi demen. I dir en zefor anplis i bezwen ganny fer e vitman.

MNA Sylvanne Lemiel lo son kote in demande ki bann madanm dan Lasanble zot pran tou bann sizesyon ek propozisyon ki sorti dan sa deba e anmenn kot gouvernman e bann lazans konsernen pour vwar en solisyon konkret.

MNA Lemiel in osi demann tou bann zonm dan Lasanble Nasyonal pour zwenn zot dan sa demars pour adres sa bann problenm ki dan bokou ka bann lotorite konsernen i okouran, lekol ek servis sosyal i konnen me selman personn pa pe pran aksyon pour aplik lalway e adres sa bann sitiasyon enn fwa pour tou.

Ler ti’n ariv ler pour vote bann manm ti donn zot sipor inanim sa mosyon.

Marie-Anne Lepathy