Dife dan forklift kot IOT |13 April 2022
Domaz okazyonnen par sa dife
Lazans Servis Tenny Dife ek Sovtaz ti bezwen entervenir yer swar pour tenny en dife dan en ‘forklift’ dan en lasal ki sarz batri kot lizin ton (IOT).
Zot ti ganny alerte lo sa lensidan ver 7er50 e deswit zot ti deplway de masin tenny dife, en bowser delo ek douz personnel pour tenny sa dife.
Sete en travayer IOT, Patricia Larame, en supervisor pour distribisyon pwason, ki ti santi en loder karoutsou pe brile sorti dan direksyon lasal kot i sarz batri pour ‘forklift’ e i ti alert son bann siperyer. Menm si bann travayer ‘Safety’ ti pe sey tenny sa dife touzour, zot ti alert Lazans Servis Tenny Dife ek Sovtaz ki ti vin deswit pour met sa dife anba kontrol ki ti’n kapab propaz dan bann tenk dyezel ki pa ti tro lwen avek sa landrwa kot sa lasal ki sarz batri e koz plis dega.
Sa lasal sarz batri in sibir enpe domaz ki pa tro signifikan, sirtou dan son plafon enkli serten parmi bann batri e detrwa stasyon ki sarz batri.
Sa ‘forklift’ li in ganny andomaze konpletman.
Teks ek portre par Patrick Joubert