Lapolis i entervenir pour tir lager dan distrik Persévérance |13 October 2021

Lapolis ti bezwen ranfor adisyonnel sorti dan lezot younit departman lapolis yer swar pour apez tansyon dan distrik Persévérance apre ki ti annan lager dan toulede vilaz – 1 ek 2.

Plizyer zofisye lapolis ti bezwen al dan sa 2 vilaz pour al degaz lasasen apre ki manm plizyer fanmir ti pe lager.

Dapre rapor, sa bann lensidan pe arive depi Dimans e lapolis in al met lord a sak fwa. Me sitiasyon ti deteryore yer swar apre ki manm sa bann fanmir ti servi plizyer zouti enkli ros, gran kouto ek bonm petrol pour atak kanmarad.

Lapolis ti yer swar fer omwen 6 larestasyon e plizyer dimoun ti osi ganny transporte lopital pour resevwar swen medikal apre ki zot ti’n ganny blese aparaman avek vit lakaz ki’n kase apre ki ros ti’n ganny anvoye.

En zenn-onm ki ti’n ganny arete e son de lanmen ti dan minot deryer li ti oze sove dan prezans lapolis obor kordgard Persévérance. Plizyer zofisye ti reazir e tay avek li pour atrap li e anmenn li dan kaso.

Nou ti menm vwar en madanm ki ti pe esey vin dan kordgard pour vin koz avek sa ki i ti dir i son msye ki ti’n ganny arete. Me bann zofisye lapolis pa ti otoriz li.

Ver 9er45 aswar sitiasyon ti anba kontrol, me lapolis ti ankor lo alert pe patrole dan sa 2 vilaz.

Sa lensidan i swiv en lot ki ti arive Eden Village, Roche Caïman an Zilyet sa lannen.

I regretab ki bann sitiasyon parey pe arive Sesel.

En zefor par tou bann lotorite i neseser pour konpran vre lakoz sa bann lensidan e aksyon i bezwen ganny pran avek bann ki pa kapab viv trankilman dan en kominote.

Dan en pei modern, napa plas pour sa bann kalite aksyon e tou dimoun i bezwen konpran ki fodre zot responsab zot aksyon akoz zot afekte zot vwazen, piblik an zeneral e osi met presyon lo bann servis dirzans.

Parey lapolis in dir ki en lanket pou ganny fer dan sa lensidan, nou ekspekte ki aksyon sever i ganny pran avek bann ki responsab.

Gerard Govinden