Kominike Lapolis   |15 September 2021

En madanm 24-an i ganny arete an posesyon plis ki 32,000 dolar Ameriken

Lapolis in raporte ki son zofisye sorti FCIU ek ANB pe fer lanket dan en ka kot en madanm 24-an sorti Foret Noire ki anploye konman en zofisye lenformasyon ti ganny entersepte e lafouy fer lo li ek dan son bagaz erport Sanmdi le 11 Septanm.

Swivan sa lentervansyon, en sonm 32,900 dolar Ameriken ti ganny dekouver e sezi dan posesyon sa madanm ki ti pe ganny akonpannyen par en fiy anba laz ki ti pe al kit pei pour Dubai  lo en voyaz biznes lo lapar son manman.

Sa madanm, ki pa ti kapab zistifye lakoz sa kantite larzan dan son posesyon, ti ganny arete e pe ganny ankete anba ‘Money Laundering as per section 3 (1) of the Anti-money Laundering and Countering the Financing of Terrorism Act’.

Swivan sa dekouvert e larestasyon sa madanm, en lafouy ti plitar egalman ganny fer kot lakour son paran e la osi i annan serten kantite dokiman ki ti ganny dekouver e sezi antretan ki lanket i kontinyen dan sa ka.

Sispe dan ka kas lakaz e vole i repas ankour

Sa sispe ki ti’n ganny anmenn ankour Lendi dan lensidan arive Anse Royale ek Au Cap, in reaparet ankour yer bomaten kot in ganny rimann pour 14 zour.

Antretan lapolis i kontinyen avek zot lanket.