En sispe i ganny rimann dan lanmor Silvana Jeanne |05 August 2021
Lapolis in raporte ki lanmor Silvana Jeanne, sa madanm aze 53-an ki son lekor ti ganny dekouver dan en pti larivyer deor lakour kot i reste St Joseph dan distrik Grand Anse Praslin, Mardi granmaten, pe ganny trete konman en mert.
Sa zonm, son partener ki ti ganny arete Mardi swivan rapor sa lensidan trazik, ti yer bomaten ganny rimann konman sispe dan sa ka par en ziz Lakour Siprenm.
Sa sispe pou aprezan repas ankor devan Lakour Siprenm le 18 Out. Lanket antretan i kontinyen dan sa ka.
En peser in raporte manke lo lanmer
Lapolis in ganny enformen ki Ronny Meme aze 37-an e ki reste La Retraite, kaptenn lo en bato lapes anrezistre lo non Marliz 806, i manke lo sa bato ki abor ti annan 3 zot peser ‒ limenm Ronny, en lot zonm e en peser madanm.
Sete madanm proprieter sa bato ki’n enform lapolis lo sa lensidan atraver sant komann lapolis ver 1er granmaten yer, Merkredi. Dapre madanm sa proprieter bato, sete sa peser madanm ki’n raport sa lensidan avek son msye ver 00:50 Merkredi bomaten.
Touzour dapre rapor, sa bato konzele 50 pye longer ti’n kit ater ver 2er30 a 3er apremidi Mardi pour al lapes kot normalman zot fer 8 a 10 zour avan retourn ater. Swivan sa rapor Gard Lakot Sesel ti ganny enformen e deplwaye pour lasistans e loperasyon resers pour retrouv Ronny i ankor pe fer dan zanmerant kot lensidan in raporte kapab arive.
Lanket in konmanse pour etablir sirkonstans sa lensidan.
Kominike lapolis