Sonnen lorloz, sonnen |15 June 2026
Sonnen lorloz, sonnen
Depi en pe letan Victoria
Ti get touni
Depi enpe letan konmsi kapital lemonn kreol
Ti dan en nespes dey
Menm sa gro trafik 4er ti mank ou
Parey en fraz ki mank pwen
Parey en fiyanse
ki'n perdi son bag presye
Ti annan en vid
En vre silans toner!
Lekel ki ti pou dir
Ki sa striktir minyatir
Sa lank kolonyal zete dan leker sa zil sovren
Ti pou vin en senbol ikonik?
Ti pou vin en pwenmwak anblematik
Lekel ki ti pou mazinen
Ki sak mouvman sa revey
Ti pou evey en mervey pou sa pep?
La kot ou ete
Kot ou'n sele
Ou'n temwanny bokou
Depi kouler ziska parfen
Ou’n konn
Depi pous de lebra, kanmiyon, Tata lafimen ziska hybrid
Ou'n vwar Antoine Abel, lerwa sega, Ton Joe, Kwame, Ketty, Sheila, Viv sanite zot pasyon
Ou'n tann boum boum dan zironmon, ou'n tann bal dan penpen, ou'n tann sa klasik 'O Victoria'
Ou'n salye gouverner, papa labarb, prezidan lakolet san bliy manrmay geto
Ou’n fer salanm ou de dalon bisantener, zot de Sir Selwyn Selwyn Clark,
bouz bouz ou leren ler Barrel ti pe dekok morso
Ou'n sonn laklos
Pour al rod gato piman Tingsanmi ek limonnad bwar lanmenm
Ou’n anons ve bann lanmoure pli senser
Ou'n vwayaz dan bann kartpostal partou dan tou kwen lemonn kot ou kapab mazinen
Ou’n frekante, ou'n anvoy beko
Ou'n donn en milyon randevou
Me,
Me ou lwayote..
Ou lonbri in reste
Ou’n reste, batman leker sa lavil
Batman leker sa nasyon
Get zot
Pe servi AI
Pour antisip ou kouler
Zot dir ou zegwir pou vin pli bel parey lebra Popay
Get zot
Zot in anvlop ou an nwanr ek blan konmsi papye nasyon
Met ou en rob
Konmsi ou pa'n deza granzar
Nou'n sandel ou
Nou’n piyondenn ou
Nou’n egzors tou lanmertim
Ki ti pe ratatouy dan ou lasyer
La ou lib
Nef
Miskle
Imakile
Mazestye
Listwar i rakont ou parkour dan nef valiz
An nef morso
Me la listwar pe temwanny en lot sapit dan ou testaman
Set fwa
Set fwa ou pou sonnen ozordi
Set fwa ou melodi pou rezonn dan nou leker
Set fwa ou lanmizik pou rezonn dan nou nanm
Me ou pa pou fer zis en sel ve
Zis enn
Ki pou ankor 50-an
Ou pou vin sa senbol
Lepanouisman en pep progresif
Ankor 50 dela e odela
Ou pou sonn lafyerte Seselwa
Ou pou sonn lafyerte pep Kreol
Sonnen lorloz
Sonnen!
Reuban Lespoir