En zonm i ganny transporte Lopital Sesel apre en aksidan Au Cap |04 January 2017

En zonm ti ganny transporte Lopital Sesel yer apremidi apre ki loto ki i ti pe dray ti tap avek larou deryer en pti pick-up apre al tap an plen dan en bis Tata.

Sa loto ti pe fer direksyon lavil tandis ki sa pick-up ek bis ti pe diriz ver sid Mahé ver 3er15 apremidi.

I pa kler ki mannyer sa loto ti’n kit son kote semen e al tap avek sa de transpor, me dimoun ki ti prezan i dir ki drayver sa loto ti perdi kontrol son veikil.

An rezilta lenpak sa aksidan, drayver sa loto ti pri dan son transpor e apre ki bann zofisye Lazans Servis Tenny Dife ek Sovtaz ti ariv dan sa landrwa 15 minit plitar, ti pran zot 30 minit pour koup transpor e tir sa zonm ladan. I ti answit ganny transporte Lopital Sesel.

Sa aksidan ti ariv Au Cap pa lwen avek Veni Shopping Centre.