Takamaka meyer distrik kiltirel |18 November 2015

Distrik Takamaka i gran venker premye edisyon Pri Distrik Kiltirel organize konzwentman par Minister Tourizm ek Kiltir ek Minister Zafer Sosyal, Devlopman Kominoter ek Spor.

Seremoni remiz pri ti fer kot Sant Konferans Enternasyonal (ICCS) yer apremidi.

Trez distrik antou ti dan final kot zot ti resevwar sakenn en sertifika. Sa ti Au Cap, Anse Boileau; Anse Royale; Baie Ste Anne, Praslin; Baie Lazare; Beau Vallon; Bel Ombre, Bel Air, Cascade; Rivière Anglaise; Mont Fleuri, La Digue ek Takamaka.

Prezan kot seremoni ti Minis pour Tourizm ek Kiltir, Alain St Ange; Minis pour Zafer Sosyal, Devlopman Kominoter ek Spor, Vincent Meriton; Minis pour Litilizasyon Later ek Lakaz Christian Lionnet; Lanbasader Lafrans pour Sesel, Lionel Majesté-Larrouy; manm lasanble, ladministrater distrik ek lezot envite distenge.

Minis Meriton ti rann omaz viktim latak teroris ki ti arive an Franse boner sa semenn e ofer en minit silans.

Konkour Pri Distrik Kiltirel ti lanse an Novanm 2013 avek bi rekonnet bann distrik ki’n pran bann linisyativ pozitiv pour devlopman diferan laspe kiltir Seselwa. Osi pour donn zot loportinite pour demontre bann atou kiltirel dan zot distrik.

Konkour ti baze lo kat kategori: Dimoun ek Leritaz Vivan; Zwe Tradisyonnel ek Performans; Leritaz Artistik e Leritaz Bati ek Natirel.

Apard gannyan gran pri, distrik Takamaka ti osi sorti premye dan kategori Dimoun ek Leritaz Vivan; dezyenm dan Leritaz Artistik e ankor dezyenm dan Leritaz Bati ek Natirel. Anse Boileau ti premye dan kategori Zwe Tradisyonnel ek Performans; Mont Fleuri premye pour Leritaz Artistik e Bel Air premye pour Leritaz Bati ek Natirel.

Set distrik ti ganny en dokiman langazman ek departman kiltir pour ki zot a kontinyen ek zot proze avek sipor sa departman. Sa bann distrik i Anse Boileau dan son proze Dimoun ek Leritaz Vivan; Baie Lazare dan son Moniman Lazare Picault; Baie Ste Anne Praslin pour Karot Bannann; Rivière Anglaise pour Basen Prizon; Anse Royale pour Dimoun ek Leritaz Vivan; Cascade pour Fezer Kazye e Bel Ombre osi pour Dimoun ek Leritaz Vivan.

Dan son diskour Minis St Ange ti dir ki ti en gran zour pour bann distrik ki’n vin devan pour montre bann atou kiltirel zot distrik e ki sa linisyativ i en fason pour nou war konman nou a kapab fer sa maryaz ant kiltir ek tourizm. En maryaz ki in dir i devret kapab aport fri pour bann distrik me pli enportan pour bann sitwayen sa distrik ki a kapab benefisye avek sa lendistri tourizm.
“Pran sa bann lide, bann linisyativ ki zot in vin avek e fer li en realite,” Minis St Ange ti dir bann distrik.

Pour son par Minis Meriton ti siport sa linisyativ ki i dir i fer viv nou kiltir atraver dimoun.

I ti osi dir ki sa bann atou dan nou distrik i fer nou war ki pa zis lans, delo sale ek nou bann montanny ki zoli; nou annan bokou plis ki sa kot i ti donn legzanp sa koegzistans pasifik ki fer nou viv an armoni antre nou.

“Se nou kominote, landrwa kot nou viv, se sa bann platform ki permet nou kiltir pran plas,” Minis Meriton ti dir.

Pandan seremoni yer ti osi annan performans kiltirel par diferan laz dimoun sorti dan diferan distrik.

En video ki montre bann mervey kiltirel bann distrik ti osi ganny prozekte.