En gro pye mang i tonm lo en blok flat |21 October 2015

Swivan movetan ki’n kontinyen persiste yer, en gro pye mang dofinen ti tonbe e andomaz twatir kote gos en younit dan en blok flat sis younit kot Police Quarters dan distrik Mont Fleuri, dan kewaze semen ki mont Belvedere.

I ti osi andomaz en loto ki ti’n park kot sa blok flat.

Personn pa’n ganny dimal dan sa lensidan ki ti ariv ver 5er20 apremidi. Sa vye pye mang in la pour en bon pe lannen.

Dapre temwen ti annan zafan ki ti pe zwe deor me akoz ki lapli ti’n vin for en kou angran zot ti antre anndan e sete a sa moman ki sa pye mang, ki ti’n pouri konpletman anba kot son rasin, ti tonbe.

Madanm Marinette Gobin, ki twatir son younit in andonaze, ti rakonte: «Ti annan trwa nou pe get televizyon ler nou tann sa gro tapaz. Mon ti krwar flat ti pe grennen.»

I ti osi fer remarke ki i ti’n fek telefonn lazans pour risk ek dezas son bomaten konsernan sa pye mang me ki i ti ganny dir ki sa dimoun konsernen pa la.

«Zot pa ti kontakte mwan ankor,» i ti fer remarke.

Prezan osi pour evalye sitiasyon ti Minis pour Litilizasyon Later ek Lakaz, Christian Lionnet, zofisye lazans risk ek dezas e zofisye lazans tenny dife ek sovtaz ki ti pe koup sa gro pye mang.

Dapre administrater distrik Mont Fleuri Jency Volcère laranzman ti pou ganny fer pour rod en landrwa dormi pour sa set manm fanmir sa younit pour yer swar me Madanm Gobin ti dir ek zournal Seychelles NATION ki li i ti pou reste pour vey son bann zafer.

Antretan bann zabitan La Misère ti san elektrisite yer swar apre ki en lot pye dibwa ti’n tonm lo poto elektrik. Dapre PUC i ti sipoze pran zot 8 erdtan pour re-donn kouran dan sa landrwa.

Roche Caiman vizavi bazar 2 pye dibwa ti’n tonm atraver semen e drayver ti bezwen servi semen alternativ.