Seremoni depoz kouronn fler i mark Lazournen Liberasyon |06 June 2015

Lazournen Liberasyon ti marke yer par en seremoni depoz kouronn fler kot Moniman Liberasyon devan Maison du Peuple.

Sa levennman in vin enn tradisyonnel depi 1978 e i selebre an memwar tou bann ki ti perdi zot lavi kan predeseser Parti Lepep, parti SPUP (Seychelles People’s United Party) ti vin o pouvwar le 5 Zen 1977.

Premye pour poz kouronn fler devan moniman ki mye koni konman ‘Zonm Lib’ ti sekreter zeneral Parti Lepep Msye Danny Faure, ki osi vis-prezidan pei. I ti swiv par lezot manm komite santral parti, lezot kad e osi en reprezantan sak distrik.

Sa lannen i fer dezyenm fwa ki seremoni depoz kouronn fler in deroul devan Maison du Peuple, ki osi biro Parti Lepep. Sa i apre ki Moniman Liberasyon ti lannen pase sorti lo laveni 5 Zen kot i ti’n ete pour sa dernyen 36-an e bouz dan sa nouvo lokasyon.