Ankor sikse pour lazenes |06 June 2015

En nouvo Youth Services Bureau in ouver ofisyelman dan vilaz Perseverance 2.
Lofis kot sa servis pou baze ti ouver par sef egzekitif Konsey Nasyonal pou Lazenes (SNYC) Vicky van der Westhuizen pandan en seremoni Lendi apremidi.

Seremoni ti deroul dan prezans Minis pour Lanplwa ek Resours Imen Idith Alexander, depite sef egzekitif SNYC Alvin Laurence, osi byen ki plizyer zenn Perseverance ek bann reprezantan SNYC.

Letan i ti pe adres bann envite, Madanm van der Westhuizen ti dir ki sa nouvo lakonplisman pe osi reponn laspirasyon bann zenn.

I ti remersye bann partener ki enkli Cable & Wireless ek Jj Spirit Foundation pour zot langazman senser vize ver lepanouisman ek devlopman lazenes.

Madanm van der Westhuizen ti osi lans lapel avek bann lezot partener pour vin devan e ed sa konsey dan demars pour ouver en tel fasilite dan lezot landrwa kot i anan demann.

I ti fer resorti ki gouvernman i kwar dan abilite ek potansyel bann zenn.

“Se pour sa rezon ki nou rod tou fason ek mwayen pour met a zot dispozisyon loportinite pour zot kapab devlope,” i ti dir.

“Mon konvenki ki zenn Perseverance pou servi sa fasilite pour agrandi zot konnesans dan zot letid e dan zot profesyon,” Madanm van der Westhuizen ti azoute.

I ti lans en lapel avek bann paran dan sa vilaz pour gid bann zenn dan bon direksyon pour ki sa fasilite i anmenn gran benefis pour lakominote.

Apre louvertir, bann envite ti ganny sans vizit sa fasilite e enterakte.

Apre louvertir, bann zenn ti kapab konmans servi fasilite dan sa sant