Zenn onorab i propoz en sistenm spesyal dan bis pour dimoun sourd |21 July 2014

Manm Lasanble Nasyonal Lazenes in vot anfaver en mosyon ki demann gouvernman pour met en sistenm spesyal dan bann bis piblik pour fasilit bann dimoun sourd ki pe voyaze.

Mosyon ti ganny propoze par reprezantan lekol Mont Fleuri segonder Jalna Isaac.
Lide pour en tel mosyon i swiv en rankont ant bann manm avek bann zenn sourd ki ti ganny organize par lasosiasyon bann dimoun sourd.

Onorab Isaac ti propoze ki dan bann bis piblik i merit annan en sistenm ki pou kapab endik bann dimoun ki sourd ki bis pe arete ou pe leve.

E i ti menm azoute ki bis i merit annan en lalimyer ki alimen pour endike ki bouton ki ou peze pour endik drayver pour arete i marse oubyen non.

Mosyon ti ganny segonde par Onorab Christelle Hoareau, reprezantan distrik Glacis e ti ganny siporte par trwa lezot onorab – Lubina Constance (reprezantan La Digue), Virginie Ernesta (lekol La Digue segonder) e Akash Paunikar (lekol Praslin segonder).
Tou le 24 manm ki ti prezan pour sa enn rankont ki ti fer Sanmdi ti vot anfaver mosyon.

Sa sesyon lasanble ti deroul dan prezans depite sef egzekitiv Konsey Nasyonal Lazenes Sesel Alvin Lawrence, bann zofisye konsey e osi Dr Henry Telemaque, ki sirizyen ansarz kot Lopital Sesel.

Apre zot deliberasyon, bann manm ti ganny sans agrandi zot konnesans lo kanser atraver en prezantasyon ki Dr Telemaque ti fer.
I ti eksplike kisisa kanser, diferans ant kanser avek timer (tumour).
Prosen rankont Lasanble Nasyonal Lazenes i le 23 Out.