VIKTWAR NET |21 August 2011

Sa kou la
Konmdir zans la
En Sesel ki mari for
E nou tou, nou mari kontan
Kar finalman, nou’n pers dalon, net.

Mon reviv lanbyans anndan e andeor
Lanbyans sa welele ki nou’n kriy for
Lapeti sa spektater ki gouli lor
Zot oule ankor e ankor
Lev pwa i pran tou dan en bor
Laboks ki reklanm son podyonm, son mars lor
Natasyon ki flot son loner, bel zefor

En lekspektasyon depase
En lakonplisman konsanti
En nouvo paz dan sport
En lot defi pour defann

Mon’n partaz sa determinasyon
Sa lespwar lanvi gannyen.
Dan graden e koulis pale de spor
Sispans dan bann bate pran rann
Lo ver gazon Stad Linite
En golkip ki plann tou son longer
Pour akonplir en pli bel dezir pour son patri

Dan larmoni ki Losean Endyen in zwe,
Gras a sa akorde
Parey dan son lim nou’n sante
Nou not e rikord en viktwar net
Apard enn pti defayans
Bann pti desepsyon ant ant
Nou a koz nou zwe
Nou a koz sa zwe ziska amenn.

 © Justin D. Valentin
Out 2011