Zak dan laform en kokodmer |23 October 2010

Lindy i dir ki parfwa bann zak lo sa pye zot aport koste e i tre difisil pour remark diferans ant zot e sanmenm lo komansman i ti kwar zot ti’n selman koste tou ansanm.

Me anmezir i pe grosi, sa zak i reste kole menm, Lindy i dir.

I dir dan sa pye i annan bokou lezot zak, me zis sa enn ki koumsa,Lindy i dir laplipar letan se vwazen ki kas sa bann zak pour zot prop konsonmasyon. Me parler dimoun i demann li e zot kase pour vann.

I fer remarke ki in fini dir zot ki ler sa zak ‘kokodmer’ i mir, fodre zot vann li antye, pa koup par trans.

Dapre konpran, bann zak dan sa menm pye i byen goute, menm si li Lindy i dir i domaz ki i pa tro kontan manz zot akoz lenkonvenyans ki lakol i poze. I dir ki pa reste bokou letan pour sa zak mir.

Lindy i dir ki sa pye zak ti la letan i ti aste sa landrwa detrwa lannen pase e premye fwa i vwar en zak ki kol ansanm parey en kokodmer.

Me fodre note ki, en pe letan pase, en zabitan Praslin ti anvoy nou portre en zak kol an de, egzakteman parey en kokodmer. E pli enteresan ankor, sa pye zak ti trouve zis obor Vallee de Mai, landrwa kot kokodmer i pous dan son leta natirel. Me si lo Praslin kokodmer in annan keksoz pour fer avek laform sa zak, kwa ki’n kapab arive avek sa enn dan lakour Lindy ?