Group Sokwe i fet son 18-an dan lanmizik Sesel |05 December 2009

Inisyalman formen avek bi pour promot e valoriz lanmizik ek ladans tradisyonnel, ozordi 18-an apre, sa group in pran en nouvo lelan e osi en nouvo fason administre keksoz avek en vizyon pli profesyonnel.

Apre plizyer lannen koman en manm ansyen latroup nasyonal e pli tar group mizikal Bwa Gayak, Msye Valentin ti deside pour eksplor son talan artistik pli profon e lo en baz pli personnel.

Dapre li, se atraver son bann performans dan sa bann group ki’n ouver son laport e anmenmtan donn li bann loportinite pour perform dan bann diferan lenstitisyon avek son nouvo group.

Pour komanse pa ti fasil, akoz dapre li ti napa ase dimoun ki ti pare pour pran sa defi ansanm avek li, me atraver son devosyon ek perseverans in kapab debrouye.

An 1995, Msye Valentin ti pli determinen pour anmenn son group pli devan e se la ki i ti rekrit nouvo manm ki ti enkli bann pli zenn zenerasyon mizisyen e osi danser. Sa, i dir, ti anmenn en nouvo eleman dan group, sirtou lo kote disiplin ek lorganizasyon.

Lo kote bann repertwar, Sokwe ti’n a en serten pwen dezoryant zot avek vre kiltir Kreol e ti pe  komans say avek bann stil lanmizik ki ti pe pli enfliyans lasosyete sa lepok, tel ki reggæ.

Msye Valentin i dir ki apre en moman refleksyon, i ti komans realize ki sa pa ti pe anmenn zot lwen e se la ki i ti deside pour retourn ver vre kiltir Kreol e depi sa zot pa’n vir deryer.

Pour lemoman, Sokwe pe perform senk fwa par semenn, e pour Msye Valentin sa i en laprev konkret ki kiltir Seselwa i annan son vre plas pour zwe dan devlopman lekonomi pei e ki group Sokwe i lo bon semen dan son misyon pour valoriz sa kiltir.

In osi azoute ki Sokwe i pli determinen pour kontinyen lo sa menm larout, e in osi envit lezot group pour zwenn zot dan sa demars pour anmenn kiltir Kreol pli o posib.

Avek bokou devlopman touristik aktyelman, Msye Valentin i dir ki i annan en gran demann pour sa kalite lanmizik e in osi azoute ki i annan sifizaman plas pour plizyer lezot group ek mizisyen kapab aport zot kontribisyon.
Pandan son 18-an legzistans, group Sokwe in osi fer sorti kat albonm.

R.D.