23enm Festival Kreol-Nor ek Sid i akey Dimans Kreol Borlanmer |25 October 2008

Premyerman lo lans Beau Vallon pou anann en gran manifestasyon kiltirel, artistik e osi sportif anba non Selebo Wayerles.

Sa aktivite pou konmans ozordi menm tar dan lannwit e i pou repran demen lazournen.
Dapre bann organizater, zot in swazir sa non Selebo Wayerles vi ki lontan sa sit ti apel La Wayerles akoz ti annan en gran lema ki ti plase la.

Tanto pou annan en gran moutya ki pou konmans 11er e pou ale zista granmaten demen. Pou osi annan lavant manze ek labwason kreol.

Demen, aktivite pou komans apartir 6er bomaten avek en gran bazar kot manm piblik pou kapab vin aste zot legim, fri, lavyann ek lezot zartifay pour lakwizin.

Apartir 10er bomaten bann diferan aktivite pour egey piblik pou komanse. Pou annan lavant diferan manze ek lezot lobze artizanal. Pou osi annan bann diferan zwe labitid tel ki ‘lucky dip’, ‘roll-a-rupee’ e ‘hoopla’.

Dan sid, pli presizeman Anse Royale, diferan aktivite pe ganny organize lo lans e osi kot Leisure Park.

Sa levennman pou komans avek en gran laserenad par bann zanfan lekol ki pou komans apartir 10er bomaten kot lekol primer. Zot pou ganny akonpannyen par group mizikal Ravazer.

Dan delo sale pou annan bann diferan paryaz tel ki mini Mae avek pagay e osi masin, kartye maron, parmi plizyer lezot.

Kot Leisure Park limenm, pou annan diferan ‘stalls’ kot manze kreol, legim, fri ek travay artizanal pou anvant.

Pou osi annan bann zwe tradisyonnel pour egey lafoul.
Bann zanfan e piblik ki enterese pou kapab vin ekout diferan rakontaz zistwar kreol ki pou ganny fer par bann dimoun pli aze.