Kominike Lapolis-Plis ki 1.5 milyon roupi frod kot labank Barclays |11 July 2008

5-an prizon pour kas batiman e vole

Lapolis in raporte ki Terence William, sa zonm 39-an sorti La Digue me ki ti pe reste Cascade, in kondann 5-an prizon yer pour lofans kas batiman e vole. 

William ti komet sa lofans letan i ti kas en laboutik lo Lari Larevolisyon pandan lannwit le 12 a 13 Me e vol plizyer lobze elektronik parey telefonn portab, kamera ek mont.

En zonm i ganny sarze pour de ka labi seksyel

Lapolis in raporte ki sa zonm 44-an sorti Bel Air, Praslin ki ti ganny arete le 21 Zen e ganny sarze son semenn answit devan Lakour Siprenm pour lofans labi sekyel lo en pti fiy 8-an in ganny sarze yer pour ankor 2 ka labi seksyel -- enn lo en pti fiy 8-an ek enn lo en pti fiy 12-an. 

Lakour in ordonnen ki sa akize i kontinyen ganny rimann prizon Montagne Posée landrwa kot i ti pe ganny detenir pandan sa 2 dernyen semenn.
Sa akize pou repas ankour le 24 Zilyet.

En garson pe rimann an koneksyon avek en ka vol

En garson 17-an sorti Roche Caiman ti pas ankour yer an koneksyon avek en ka vol e in ganny rimann ziska Merkredi le 16 Zilyet. 

Sa lensidan vol ti ariv kot Zarden Zanfan anvil le 28 Zen ver 1.45 apremidi ler sa garson, ki ti arme avek en kouto, ti vol telefonn son viktim.

En zonm pe rimann pour vole e osi reziste larestasyon

En zonm 27-an sorti Bougainville in ganny rimann an koneksyon avek lofans vol lekipman lapes e reziste larestasyon. 
Sa bann lofans ti ganny komet le 16 Zen Bougainville e sa sispe ti ganny arete Merkredi. 
I ti pas ankour yer apremidi e pou repas ankour dan 14 zour.