Non prop dan prosesis kreolizasyon-Kan ki non prop i kapab ganny ekrir an kreol ? |02 March 2007

Partisipan sa latelye ti bann partener ki enplike dan promosyon lalang kreol telki bann manm Komite Nasyonal Lalang Kreol, bann zofisye Minister Lar, Kiltir ek Spor, Minister Ledikasyon, reprezantan Biro Prezidan, zidisyer ek medya.

Dapre direktris Lenstiti Kreol, madanm Penda Choppy, en tel sesyon travay ti neseser akoz ziska prezan pa’n annan en lareg kler lo kan en non prop i kapab ganny kreolize.

Swivan bann travay ek diskisyon, ki bann organizater in dekri koman tre ouver, fran e serye, bann partisipan ti a lafen adopte plizyer rezolisyon ki etabli tre klerman dan ki sirkonstans bann non prop i kapab ganny kreolize.

An sa ki konsern non en dimoun, in etabli ki pour plizyer rezon sirtou legal sa pa pou kapab kreolize me parkont napa personn ki kapab anpes en dimoun donn son zanfan en non an kreol ki li i swazir si i anvi.

Pour non bann pei bann partisipan ti inanim dan zot desizyon ki sa bann non pei i kreolize ler nou pe ekrir oubyen koz lo zot an kreol. Bann partisipan ti fer resorti ki i deza annan bann pei ki nou’n deza fini kreolize ler nou koze, par egzanp Moris, Langleter, Litali. Me pour lezot parey Georgia i ava vin Lazorzi, Germany i ava vin Lalmanny, United States i a vin Letazini, ensidswit. Bann partisipan ti fer remarke ki sak lalang i annan son fason ekrir non bann pei e ki kreol i devret osi annan pour li.

Pour bann non distrik isi, bann partisipan pe rekomande ki pour rezon istorik, akoz plizyer distrik in ganny nonmen apre bann gran non ki’n mark nou listwar, alor zot devret ganny prezerve e reste dan zot lorizinalite. Me in etabli ki Sesel i devret en leksepsyon akoz in fini ganny aksepte depi byen lontan e tou dimoun i dir Sesel non pa Seychelles e ki dan tou nou bann slogan, mesaz e tenm nasyonal, Sesel in fini etabli. Pour bann non komen devan sa bann non prop bann partisipan i dir ki zot devret otomatikman ekrir an kreol e koman legzanp zot ti sit Anse ki ava vin Lans, Pointe ki vin Lapwent, Port ki vin Por, Mont i vin Mon ensidswit.

Dan ka kot de non komen i form non en distrik sa pou kreolize otomatikman parey dan ka Anse Royale i ava vin Lans Rwayal, North East Point i vin Lans Norde ensidswit.

Pour bann non distrik kot i annan dout bann partisipan i rekomande ki plis resers i ganny fer pour determin akoz sa landrwa i apel sa non e zot ti donn legzanp Mont Buxton ki pa tro kler lo lorizin Buxton.

An sa ki konsern bann batiman, lenstitisyon piblik e prive, in etabli ki bann ki deza la i gard zot non me pour lavenir i rekomandab ki en non kreol i ganny konsidere pour bann biznes oubyen batiman.

Bann partisipan sa latelye pe osi demande ki bann minister i annan lantet dan tou le trwa lalang.
Fodre note ki tou sa bann rezolisyon ki’n sorti dan sa latelye pou ganny soumet avek Komite Nasyonal Lalang Kreol pour ganny revwar avan ki en kopi final i ganny prezante avek Konsey Minis pour laprouvasyon.