Dernyen zour lanrezistreman voter i ozordi |27 January 2006

Msye Anaclet Tirant, ki sef zofisye ansarz lanrezistreman in dir ki i devwar tou dimoun ki annan laz pour vote pou fer sir ki zot non i aparet lo lalis voter, sirtou la ki pei i dan lannen en eleksyon prezidansyel.

Manm piblik i ganny demande pou fer sir ki zot anmenn avek zot tou bann dokiman neseser parey kart idantite e pou asire ki tou zot bann papye legal i annord dan ka kot zot in sanz sinyatir apre divors oubyen maryaz. Bann ki'n sanz distrik fodre anmenn zot dokiman transfer. 

Tou bann biro lanrezistreman voter dan bann distrik pou ouver aparti 3.00 er apremid ziska 6.00 er diswar. Manm piblik sirtou bann ki pe travay dan lavil i osi kapab al verifye zot non kot Biro Konmisyonner Eleksyon ki baze dan lasanm 203 batiman Aarti Chambers, Mont Fleuri. Sa biro pe resevwar dimoun depi 10.00 er bomaten ziska 12.00 e 1.00 ziska 6.00 er diswar.

Msye Tirant in lans en lapel avek manm piblik pour zot pa esper dernyen moman oubyen dernyen ler pour al verifye zot non, akoz sa i kapab kre dezord.

I ti sepandan dir ki ziska prezan i satisfe avek lafason ki lanrezistreman pe deroule e avek lakantite dimoun ki'n al tyek zot non lo lalis.

Ziska Merkredi ti annan 29,354 dimoun ki ti'n fini al verifye zot non e sa i reprezant 46% popilasyon voter ki 63, 796.