Lensidan lo lanmer Praslin-Sispe i ganny sarze |14 January 2006

Lapolis in osi eksplike ki dan premye staz sa lanket, sa sispe ti ganny arete par lapolis e plitar lakour ti ordonnen ki i rimann ziska Vandredi le 6 Zanvye 2006 kan i ti ganny large akoz a sa moman levidans pa ti sifizan pour met okenn sarz e ni menm okenn sarz provizyonnel kont li.
 
Alor, lapolis ti kontinyen avek zot lanket pour determin tou fe sa zafer.

Apre ki i ti ganny sarze par Lakour Siprenm Vandredi, lakize, lo demann prosekisyon, in ganny rimann pour 14 zour ziska le 27 Zanvye 2006 9er bomaten kan i pou re-aparet devan Lakour Siprenm.

3 zonm i kondann 5-an prizon sakenn pour vol

Lapolis in raporte ki trwa zonm in kondann sakenn 5-an prizon pour vol posesyon en touris.

Leonard Celestine sorti Mont Buxton, Ricky Robert sorti Roche Caiman e Jacquelin Andoise sorti Hermitage ti kondannen Lendi 10 Zanvye.

Dapre en kominike lapolis, sa lensidan ti ariv lo semen Maravi apre ki Andoise ti debarke dan en loto dan ki ti osi annan Celestine ek Robert, koup lanmans sak en madanm Italyen ki ti pe al manze kot restoran Chez Batista.

Letan sa lensidan ti arive sa madanm, ki ti akonpannyen par son msye, ti pe marse sorti Plantation Club.

Dan sak ki Andoise ek son 2 akonplis ti vole ti annan larzan an deviz, en kart visa ek en kart idantite.

Sa 3 zonm ti ganny arete plitar par lapolis apre ki sa 2 etranze ti’n donn nimero loto ki zot ti ladan.