Festival Kreol/Fon Lanmal-Koleksyon Feathers i sorti meyer |31 October 2005
Sa aktivite annyel lo kalandriye Festival Kreol ki ti deroul kot lotel Mahe Beach Vandredi swar, ti enn ki bann organizater in dekri koman ranpli avek talan, kot bann koleksyon lenz ti demontre elegans, kalite, avek sa latous final byen detaye e rafinen.
Sa kat zenn stilis ki sorti lekol Visual Arts dan Seychelles Polytechnic, ti resevwar zot trofe avek Minis pour Gouvernman Lokal, Spor ek Kiltir, madanm Sylvette Pool, e en reprezantan labank MCB Seychelles, ki en gran asosye sa aktivite, msye Jose Marianne.
Parey sa tenm i endike, koleksyon Feathers ti demontre bann lenz tre leze e konfortab ki reflekte plimaz bann zwazo.
Ti annan antou 10 group stilis sorti kot Visual Arts ki ti partisip dan sa defile lanmod avek bann koleksyon anba tenm parey 'pan', 'zepis', 'pye koko', 'lalin kler', 'pizon ble', 'coco-de-mer' e lezot ankor.
Laplipar bann lenz dan sa defile lanmod, ki ti atir en gran nonm dimoun kot sa lotel e menm serten touris ki ti’n aliny bann balkon pour admir kreativite nou bann zenn stilis, ti tre fonksyonnel e azour avek lanmod modern.
Annefe ti bann lenz ki dimoun tou groser ti kapab mete e ki ti annan gran potansyel fer perse lo marse lokal.
Laspe enteresan bann koleksyon ti sa maryaz modernite avek bann varyete kouler ek laform ki egziste dan diferan lespes laflor ek lafonn dan lanvironnman.
Dezyenm pri sa konpetisyon ti al pour koleksyon Spices, monte par Veronica Mussard, Gemma Dubel, Nan Hoareau e Vanessa Jouanneau. Sa seri lenz kouler gri pal tire lo blan krenm in ganny fer an servan lagrenn ek brodri pour demontre lenflians Lafrik, Lerop ek Lazi lo nou kiltir. Sa bann stlis ti resevwar zot pri avek sekreter prensipal pour Spor ek Kiltir, msye Patrick Nanty.
Passion Fruit i tit sa koleksyon tre kolore avek ver briyan, krenm ek gro gri melanze avek somon, ki ti pran trwazyenm pri dan sa konpetisyon. Loter sa koleksyon ti Vania Savy, Jelna Gabriel, Prischilla Larame e Lionel Talma. Se sef egzekitif Barclays Bank Seychelles, msye Frank Hoareau, ki ti prezant sa kat stilis avek zot pri.
Pri konsolasyon ti osi ganny prezante avek tou lezot stilis ki’n partisip dan sa konpetisyon.
Dan dezyenm parti sa defile lanmod, manm piblik ti ganny sans dekouver e apresye talan lezot stilis parey koleksyon bann ansennyan Visual Arts, Mangouya Studio, Jo’s Tailoring, Telly’s Modelling Agency ek Myriam’s Exclusive.
Nane Hoareau ek Natasha Laval, stilis Telly’s Modelling Agency, ti emervey lafoul avek zot koleksyon kouler nwanr ek somon e mov fonse klate.
Myriam’s Exclusive ti mont en seri lenz maryaz strapless ek lezot kalite lenz fer avek sifonn, lez ek saten, tandis ki Jo’s Tailoring ti demontre kouler fler atraver likra.
Koleksyon sansasyonnel sa swar ti sorti kot Paquerette Lablache ki ti enpresyonn piblik avek en varyete labiyman tre kolore e byen rafinen fer avek saten ek linen, kot ti annan melanz kouler nwanr ek ver, rouz ek lor e gro ver ek lor. Se bann model Mangouya Studio ki ti fer sa defile.
Fon Lanmal ti termin avek en prezantasyon koleksyon klasik lenz enternasyonal fer par en group stilis Haitien MPhildor, ki baze Canada. Bann lenz ki ti enkli kor, kilot, zip ek labiyman diswar, ti apropriye pour bann madanm avek diferan latay.
