Pran mezir prevansyon kont lepidemi ladyare |12 March 2005

Ler i ti pe donn leksplikasyon avek lapres, Dokter Louine Morel ti dir ki normalman lakantite ka ki ganny raporte ler en lepidemi parey i deklare i 90 par mwan, me zis an Fevriye, i ti azoute, 160 ka ti'n ganny raporte dan bann klinik dan pei. 

Dapre li, to lenfeksyon e lafason ki sa maladi pe propaze i les zot kwar ki se en viris ki pe koz sa lepidemi ladyare e non pa bakteri oubyen mikrob parey in toultan leka.

I ti sepandan fer resorti ki zot pa ankor idantifye sa viris, me in azoute ki pandan sa premye semenn Mars in annan en bes dan lakantite ka ki pe rantre, malgre sif i ankor ase o.

En dimoun ki ganny ladyare i al lasel delo regilyerman e dan serten ka i osi annan vomisman ek lafyev.
Dokter Morel in dir ki ordinerman pasyan i rekipere apre trwa a kat zour.

Vi bokou ka ki'n ganny raporte i parmi bann zanfan, Dokter Morel in dir fodre ki paran i fer sir ki ler zanfan i sorti dan twalet zot lav byen zot lanmen. 

I ti osi konseye ki paran i donn zot zanfan ki'n ganny sa maladi bokou likid pour bwar parey delo, sirtou delo bwi ek zi fri.

Pour le moman i dir ki zot pe donn bann pasyan ki pe raport avek sa maladi konze pour zot kapab rekipere. I ti azoute ki dan ka en tel lepidemi, sa sitiasyon i ganny raporte avek sanniter.