Lazournen Enternasyonal pour Dimoun Aze-'Dimoun aze dan en sosyete enter-zenerasyon' |01 October 2004

Dan son mesaz pour sa lokazyon, Minis pour Zafer Sosyal ek Lanplwa, Vincent Meriton, in dir ki i swete ki nou reflesir bokou lo rol ki nou bann dimoun trwazyenm-az pe zwe dan sosyete e demann tou dimoun pou montre lapresiasyon pou sa bann kontribisyon.

Minis Meriton in osi lans en lapel avek nou popilasyon trwazyenm-az pour zot kontinyen angaz zot dan lafason ki zot kapab pour dibyen nou sosyete.

Koman lannen prosenn i'n ganny deklare par Prezidan James Michel koman lannen ki rekonnet bann zanfan koman nou trezor e nou lavenir, Minis Meriton in demann sak dimoun trwazyenm-az dan Seychelles pour reflesir lo ki fason zot kapab kontribye pour ki nou zanfan i devlope e grandi dan en bon fason pour vin sa lavenir prometan ki nou pei i bezwen.

An sa ki konsern tenm pour sa lokazyon, Minis Meriton in dir ki i tre enteresan akoz i pe rekonnet e selebre lenportans rol bann dimoun aze vizavi lafanmiy, zot kominote e zot sosyete. 

"I osi ed nou pour war ki mannyer nou bann diferan zenerasyon, ki enkli zanfan, zenn, mwayen-az, trwazyenm-az, zot kapab fer konfyans e envesti dan kamarad. En tel lenvestisman i pou san dout rekolte son fri," Minis Meriton i dir dan son mesaz.

"Sa tel lenvestisman i baze lo de prensip enportan e sa i legalite sans dan en fason resiprok – kot tou le de kote i respekte kanmarad e dezyenmman i osi donn sans kanmarad pour azir dan latolerans e konprenezon, ki enportan pour lape e larmoni en pep," Minis i azoute.

Dan son mesaz Minis Meriton i osi fer remarke ki Nasyon Zini i'n estimen ki an 2050 o mwen enn dan sak 10 dimoun pou annan 60 an ou plis. 

"Se nou popilasyon zenn ozordi ki pou sa popilasyon trwazyenm-az an 2050.  Alor nou bezwen fer bokou zefor pour prepar nou pour fer fas a bann defi ki sa pou anmennen.

I enportan ki nou pa get sa bann defi koman en fardo me plito koman en loportinite pour nou annan en sosyete solid ki son diferan zenerasyon i viv an armoni," Minis Meriton i dir.