Dan Lasanble Nasyonal |17 June 2021
Fon pour dezas i ganny zere par DRDM non pa par Minister Gouvernman Lokal
Minis responsab pour Gouvernman Lokal ek Devlopman Kominoter,
Rose-Marie Hoareau, in dir ki fon pour dezas i ganny zere par DRDM me non pa par son minister ki annan zis en bidze R2 milyon pour zer bann ka dirzans.
I’n fer resorti ki ler en ka dirzans i ganny koze par en dezas, sa larzan i ganny servi pour asiste parey dan ka pour aste prela pour kouver lakaz ki zot twa i andomaze, pey kontrakter pour retir bann pye dibwa ki’n tonbe, pour kas ros ki’n roule e menm dan serten ka asiste bann fanmir avek serten prodwi debaz.
I dir menm si zot resours finansyel pour sa i limite, zot ede otan ki zot kapab baze lo merit.
Minis Hoareau ti donn sa bann lenformasyon letan i ti pe reponn en kestyon par MNA pour Anse Royale, Sylvanne Lemiel.
Madanm Lemiel ti anvi konn bann prosedir ki sa minister in met anplas letan ki i annan en dezas dan nenport distrik e ki kalite lasistans ki i donn sa bann dimoun ki’n ganny afekte.
Minis Hoareau in eksplike ki dan bann ka dezas son minister i ganny gide par plan dirzans nasyonal.
“Nou rol se fasilit e kordin lentervansyon bann lazans relye avek dezas. I annan dezas ki ganny koze par serten kalamite me i osi annan dezas ki ganny kree par imen.
“Letan i annan en dezas dan nenport ki distrik se ladministrater sa distrik ki ganny enformen an premye e li i rod lenformasyon lo sa lensidan avan ki i enform sekreter prensipal gouvernman lokal ek zafer kominoter e osi son MNA.
“Sekreter prensipal lo son kote i bezwen enform minis e tou dimoun konsernen dan minister. Lo son kote, DA i osi kontakte tou bann lazans konsernen parey DRDM, Lotorite Plan, Red Cross… e osi son tim brigad dan distrik. Apre sa en vizit konzwent i ganny organize kot landrwa afekte pour evalye sitiasyon kot apre en rapor ek bann rekonmandasyon i ganny anvoye kot minister ek tou bann lazans konsernen tandis ki DA li i reste an kontakt avek bann fanmir pour gard zot okouran bann demars ki pe ganny fer.”
Minis i dir ki depandan lo gravite sitiasyon si zot vwar li neseser zot etabli zot prop sant komann entern dan minister pour pli byen kordin e asiste bann DA ek zot tim lo teren ki fer li osi pli fasil pour bann zofisye DRDM ganny kontakt avek zot. Minis i dir sa ti mars tre byen letan gro lapli ti frap pei an Me mwan pase kot plizyer distrik ti ganny afekte.
Rotasyon DA pour elev standar e anmenn plis lefikasite
Fer rotasyon bann administrater distrik ki Minister Gouvernman Lokal ek Devlopman Kominoter in entrodwir pli boner sa lanneni annan pour bi elev standar e anmenn plis efikasite ek prodiktivite dan travay o nivo distrik e osi pour anmenn en nouvo souf dan karyer ek devlopman profesyonnel sa bann DA, Minis Rose-Marie Hoareau in dir.
Minis Hoareau ti dir sa letan i ti pe reponn kestyon manm elekte pour Port Glaud, Egbert Aglae, lo sa size.
“Avan sa rotasyon ti neseser pour retir lenterferans politik dan travay biro ladministrasyon distrik akoz ti evidan ki servis ki ti pe ganny ofer ti baze plizoumwen lo afilyasyon politik, en keksoz ki ganny reflekte dan bann dosye,” Minis Hoareau in fer resorti.
I dir ti osi annan en mank profesyonnalizm ek konfidasyalite dan performans serten DA e servis ki ti pe ofer pa ti lo standar ki ti devret tandis ki kondisyon ek leta serten lenfrastriktir pa ti akseptab ni pour sa DA ek son staf ni pour piblik. Serten DA ti’n dan menm distrik pour tro lontan e travay ti’n vin routin e nivo motivasyon DA ek staf ti preski pa egziste.
Serten DA ti’n vin tro konfortab e nivo prodiktivite ek lefikasite ti’n osi desann e ti napa nouvo linisyativ ki ti pe ganny entrodwir e an rezilta bann zabitan distrik ti vin fristre e ti’n nepli angaze dan devlopman zot kominote.
Minis i dir serten ladministrasyon distrik ti pe fonksyonn dan en leta lesefer kot ti annan bokou problenm relye avek kontrol ek zestyon.
I dir ki atraver sa rotasyon serten DA in vwar zot avek serten staf ki ti annan problenm latitid, lapares e move konportman ek disiplin.
“Sa sitiasyon in ganny adrese tre vit par mon minister akoz i pa akseptab e pa pou ganny tolere,” Minis Hoareau in fer resorti.
I dir ki depi ki sa rotasyon in ganny fer in annan gran amelyorasyon dan kalite servis ki pe ganny delivre, i annan plis transparans e bon gouvernans dan zerans bann ladministrasyon distrik akoz bann DA in konpran ki zot bezwen rann kont e bezwen swiv bann regilasyon ek gidans minister.
Bann DA pe travay pli byen ek kanmarad e zot pe partaz bann bon pratik e dapre bann rapor ki minister pe gannyen, piblik pe santi zot pli konfortab e pli alez pour akse bann servis ki biro ladministrasyon distrik i ofer.
Minis Hoareau in osi enform Lasanble ki son minister pe travay etrwatman avek DPA pour met tou bann DA lo en kontra pour fer ki zot santi zot pe ganny trete egalman e pou fer ki zot delivre pli byen dan zot travay.
Minis Hoareau ti osi reponn plizyer lezot kestyon konsernan son minister e sa ti enkli bann proze distrik parmi lezot ankor.
Marie-Anne Lepathy