Galet i vin rar lo marse |27 April 2020
Galet i en gadyak kreol ki bokou dimoun i apresye
Bokou dimoun ki prefer galet oubyen koudpwen mannyok pour zot gadyak dan bomaten ou pour en pti manzay dan lazournen olye dipen ou lezot keksoz, in pandan sa de semenn restriksyon asosye avek pandemi COVID-19 vwar zot pa pe ganny zot gadyak prefere akoz bokou magazen dan distrik napa sa komodite.
Malgre serten magazen dan lavil parey STC Hypermarket in konfirmen ki i ankor pe ganny fourni tou le semenn parey labitid, dan plizyer magazen dan distrik sa komodite in disparet lo letazer.
Akoz ki galet in rar en sel kou?
En pti konversasyon avek plizyer bann prodikter galet dan leo Val d’Andorre in eklersi enpe akoz i annan sa mank.
Madanm Alice Confiance i dir i annan en bon pe letan depi in aret fer sa prodwi pour met dan bann magazen me i plito konsantre lo fer pour bann kliyan lo rekomand selman.
I dir son bann kliyan zot mont anler menm dan leo pour vin serse letan in fini prepare.
I dir i osi annan enpe kliyan ki anvil e i anmenn pour zot ler i desann bazar dan Sanmdi.
Msye Marc Mothe, ki vann son prodwi anba etiket AMA Farm, lo son kote i dir ki li osi i ankor pe kontinyen fer galet menm si i pa pe fer menm kantite parey enpe letan pase menm si demann pour sa komodite i kontinyen ogmante e i ankor pe delivre dan enn de magazen tou le semenn parey labitid.
“Demann i annan me mon travay mon tousel e mon lasante pa permet mwan pour fer sa kantite. Lontan mon ti griy akout 75 kilo mannyok par zour me la konmela mon fer zis anviron 75 kilo par semenn,” Msye Mothe i dir.
I ti fer resorti ki apre i nepli kapab plant mannyok parey lontan e si i ti pou rod dimoun pour ed li ogmant prodiksyon, i pou bezwen al aste mannyok e napa rannman koumsa.
Lo son kote Msye Wilfred Magnan ki vann son prodwi anba WM Farm i dir ki in ganny dir par serten marsan pour pa anmenn sa komodite akoz dimoun i pas dan laboutik rar avek restriksyon lo mouvman e lavant in tonbe.
Me eski sa i vre? Dimoun pa zot kontinyen pran zot gadyak menm anba restriksyon? Pa zot kontinyen al magazen pour aste manze e diferan keksoz ki zot kontan?
“Pour dir ki sa komodite pa vann sa pa vre ditou akoz mwan sak fwa mon vin magazen si mon annan mon 30 roupi mon kontan aste en pake galet,” en madanm alaz ki mon ti koz avek ti fer mwan konpran.
“Mon krwar sa bann marsan pa pe pran galet la akoz zot onte pour vann sa komodite pli ser,” i ti azoute.
Me toudmenm Msye Magnan i dir i ti pe griy akout 200 kilo mannyok par semenn me la akoz laboutik pa pe pran in redwir kantite e apre i ava vwar.
Menm si i konnen ki demann i annan, Msye Magnan i dir i pe zis espere ki apre bann restriksyon keksoz ava retourn normal e i ava kapab delivre son prodwi dan plizyer magazen parey avan.
Me antretan dimoun ki byen anvi zot galet zot kapab kontakte WM Farm direkteman lo limero telefonn 2717562 oubyen 2592312 pour fer laranzman pour aste galet.
I ti azoute ki avek restriksyon i osi pe rankontre enpe difikilte pour enprim bann pti etiket ki i met lo son prodwi akoz kot sa i ganny fer in osi fermen.
Sa en pwen ki en lot prodikter, Msye Hendricks Herminie, ki fer son prodwi anba etiket H.H. Farm, in osi fer resorti.
Msye Herminie i dir ki dan milye sa semenn i pe bezwen delivre son prodwi san etiket e plizyer marsan pa’n oule pran zis akoz napa sa etiket.
“Mon kwar anba en tel sitiasyon ki nou ladan ozordi bann marsan ti devret konpran nou. Menm si mon konpran ki bann marsan zot per pangar zot ava ganny problenm avek FTC, mon’n donn zot mon limero telefonn e demann zot pour fer zofisye FTC telefonn mwan si anka zot pase, zot pa oule konpran mwan,” Msye Herminie i dir.
Antretan Msye Herminie pe kontinyen son zefor pour depoz son galet dan bann lezot magazen me in kantmenm fer mwan konpran tar Vandredi apremidi ki i vreman dezapwente akoz ankor bokou marsan in refize pran son bann galet.
Alors pour ou ki kontan ou galet ou pou bezwen esper apre peryod konfinman letan bann biznes ava reouver pour bann prodikter galet kapab enprim etiket pour met lo zot prodwi pour ou kapab retrouv li dan magazen. Me sinon Msye Herminie i dir ban kliyan zot kapab pran kontakt avek H.H. Farm direkteman lo limero 2538136 pour kapab aste zot galet.
Marie-Anne Lepathy
