Lalit kont COVID-19 |17 April 2020
Sosyete Lakrwa Rouz i fer en lot donasyon
Anmezir ki sitiasyon COVID-19 i bouz lo en lot nivo, partener lokal i kolabor plis pour asire ki lasistans i ariv kot sak endividi dan pei.
Yer, Sosyete Lakrwa Rouz Sesel in ankor enn fwa asiste en lot son partener dan sa lalit kont COVID-19.
Volonter Lakrwa Rouz Sesel, Madanm Karine Ernesta, in prezant Msye Peter Estico, Zofisye Proze dan Seksyon Dirzans Lanvironnman kot Gouvernman Lokal, avek 30 camp beds, 100 blennket ek lenz pour asiste zot dan zot travay pour ed bann ki vilnerab dan kominote atraver pei.
I annan osi lezot lasistans ki sa sosyete nasyonal pe fer an vi sa sitiasyon COVID-19. En dizenn volonter Lakrwa Rouz Sesel pe osi travay avek lapolis ek Departman Risk ek Zesyon Dezas (DRDM) lo bann permi mouvman dan pei, e in osi asiste DRDM avek 4 camp beds ek lezot lozistik.
Departman Gouvernman Lokal ek DRDM i parmi bann partener kle Lakrwa Rouz Sesel. E sekreter zeneral sa sosyete nasyonal in dir ki sa ki enportan se asire ki sa kolaborasyon ek partenarya i mars byen e sak partener i konn son rol e responsabilite pour ki sak endividi dan pei i ganny asiste dan sa kriz COVID-19.
In dir ki bokou pe ganny fer pour ki bann ki vilnerab i osi pa ganny kit deryer.
Lakrwa Rouz in osi fer distribisyon serten legim ek fri kot lakaz bann dimoun aze dan pei, enkli Praslin ek La Digue.
Sa sosyete in dir ki son rol stratezik se ki bann kominote i vin pli rezilyan, donn lasistans dan en fason enparsyel san okenn diskriminasyon.
En kontribisyon Sosyete Lakrwa Rouz Sesel
